«Эбээ Маайа» ханаала биэс сааһын бэлиэтээтэ

Ньурбаҕа «Эбээ Маайа» ханаал тэриллибитэ биэс сылын бэлиэтээтилэр. 2019 с. дойдуга Тыйаатыр сылыгар СӨ үтүөлээх артыыһа Майя Слепцова режиссер кыыһын  Маргарита Васильеваны кытта сахалыы аудиокинигэ быһыытынан интэриниэт ситимҥэ ханаал арыйбыттара диэн Октябрьскай нэһилиэгин пресс-киинэ суруйар.

Билигин бу ханаалга тахсар аудио-кэпсээннэри 11 тыһыынча киһи истэр. Биэс сыл устата манна саха классиктарын 499 айымньыта ааҕыллан тахсыбыт.

500-с айымньыны Майя Петровна бэлиэ күҥҥэ көрөөччүлэр иннилэригэр ааҕан бүтэрдэ. Бу үбүлүөйдээх таһаарыыга Октябрьскай нэһилиэгин олохтооҕо, РФ доруобуйа харыстабылын туйгуна, РФ Суруйааччыларын сойууһун, «Ньурба уоттара» литературнай түмсүү кыттыылааҕа Ольга Софронова-Суһум айымньытын Эбээ Маайа аахта.