Хаартыска -- Лидия Аммосова түһэриитэ
Бу күннэргэ Өймөкөөн улууһун баһылыга Иннокентий Сивцев нэһилиэктэринэн сылдьан, оройуоҥҥа 2022 сылга ыытыллыбыт үлэни отчуоттуур.
Сордоҥноох нэһилиэгин баһылыга Альберт Вензель бэлиэтээбитинэн, отчуокка олохтоохтор бэрт көхтөөхтүк кытыннылар.
— Улууспут баһылыгын хамаандатын кытта көрсүһүүгэ кулууппутугар толору киһи кэллэ. Сордоҥноохтор сүрүн туруорсар боппуруоспут – ФАП-пыт материальнай баазата мөлтөҕө. Олоппос да кэмчи, былыргы ыскамыайкалар, оттон тэрил чааһынан этэ да барбаппыт. Бырааспыт Уруйдаана Протопопова Томтортон кэлэн көрөр. Билигин сиэстэрэлэри кытта тиэхиньиичэскэй үлэһити кытта холбоон, тэрилтэ 5 үлэһиттээх. Онон сүрүн туруорсуу ити боппуруос буолла.
Сибээспитин “Импульс” тэрилтэ хааччыйар. Былырыыҥҥыттан ыла кыра да алдьаныы-кээһэнии таҕыстаҕына, тута өрөмүөннээн иһэллэр. Онон вай-файынан туһанааччылар интэриниэттэрин үлэтигэр боппуруос суох.
Тыа хаһаайыстыбатын управлениетыгар эбии аһылык кэлиитин туруорустулар. Түргэнник ситэр салаа көтөрдөрүн ииттэр баҕалаах дьон бааллар. Ол эрээри “биирдиилээн бэйэҕит тустаах тэрилтэлэргэ тахсан быһаарсыҥ” диэтилэр. Дьиҥэр нэһилиэктэртэн барыларыттан сайаапка хомуйан баран, эрдэттэн биир тэрилтэни кытта тыа хаһаайыстыбатын управлениета кэпсэтэн кэбистэҕинэ, баһылыктар бэйэбит тиийэн ылыахпыт этэ. Былырыын мин Көтөр паабырыкатын кытта эрдэттэн кэпсэтэн баран, поруом хойуутаан хаалан, болдьоммут чааспар тиийбэккэбин, атын урутаан кэлбит киһиэхэ биэрэн кэбиспиттэр этэ. Өскө улууспут барыбытыттан сайаапка хомуйан баран, сакааспытын эрдэттэн уурдарар гына дьаһал ыллаҕына, биир-биир бытарыйбакка, тиийэн боппуруоспутун сөптөөхтүк быһаарыахпыт этэ. Бу туһунан мин тыа хаһаайыстыбатын управлениетын салайааччытыгар Руслан Атласовка санаабын тиэртим. Боппуруоһу үөрэтиэхпит диэтэ. Сордоҥнооххо эрэ буолбакка, атын да нэһилиэктэргэ түргэнник ситэр салааны сайыннарыахтарын баҕараллара чуолкай. Уонна тыа хаһаайыстыбатын управлениета тыа сирин олохтоохторо түөлбэлээн олорор сирдэригэр Томторго көһөрө буоллар диэн баҕа санаабын тиэртим. Тустаах боппуруоспутун быһаартараары, араас докумуону толортороору гыннахха, ыраах сытар улуус киинигэр айанныырга күһэллэбит.
Аны сайын аайы икки үрэҕи туоруур сиргэ ойуур баһаара барар. Ол ону «кэтээн көрүҥ» диэн тустаах тэрилтэлэр модьуйаллар. Онуоха ыраах сирдэргэ барар кыахпыт суох буолан, ойуур баһаарын кэтээн көрөргө квадракоптер наадатын туруорустубут. Улуус отчуотугар быһаарыллар боппуруостарбыт итинниктэр.
Баһылыкпыт Иннокентий Сивцев нэһилиэк олоҕун-дьаһаҕын билсэ олорор буолан, туруорсуубут кэмигэр быһаарыллан иһэр. Оттон сири оҥоруу, биэрэги бөҕөргөтүү курдук тирээн турар кыһалҕабытын бырабыыталыстыба отчуотугар туруорсуохпут, — диэн Сордоҥноох нэһилиэгин баһылыга Альберт Вензель санаатын үллэһиннэ.
Саха сиригэр быйыл “Бүтэһик чуораан” тэрээһиннэрэ ыам ыйын 24-25 күннэригэр буолуохтара. Бу туһунан Үөрэх уонна…
Муус устарга Астана куоракка Казахстан Өрөспүүбүлүкэтин Национальнай түмэлигэр “Саха сирин күндү кылаата” диэн Саха сирин…
Өрөспүүбүлүкэтээҕи 2 №-дээх балыыһа хирургияҕа киинин мобильнай биригээдэтэ муус устарга өрөспүүбүлүкэ 3 улууһугар үлэлээтэ. Ол…
Бүгүн сарсыардаттан Таатта улууһугар киһи өлүүлээх иэдээн тахсыбытын туһунан сурах тилийэ көттө. Ким буолара биллибэт…
Сыл аайы Кыайыы күнүн көрсө, бэтэрээннэргэ, сэрии сылларын оҕолоругар анаан араас тэрээһиннэр ыытыллаллар. Быйыл эмиэ…
Сарсын, ол эбэтэр ыам ыйын 7 күнүгэр Арассыыйа Бэрэсидьиэнэ Владимир Путин солотугар киирэр сиэрэ-туома ыытыллыа.…