Өлөөҥҥө 28 саастаах кыыс сураҕа суох сүттэ

ИДьМ пресс-сулууспата иһитиннэрбитинэн, кулун тутар 25 күнүн түүнүгэр Өлөөн сэлиэнньэтигэр 28 саастаах кыыс сүппүт.

Полиция салаатыгар сүппүт дьахтар дьүөгэтэ иһитиннэрбит. Дьүөгэтэ төлөпүөҥҥэ эппиэттээбэт буолбут. Сүппүт дьахтары бүтэһигин Өлөөн нэһилиэгэр кэргэннии ыалга көрбүттэр. Ол ыалтан кини сарсыарда биэс чаас саҕана барбыт.

Билиҥҥи туругунан, полиция үлэһиттэрэ суһал-көрдүүр үлэни ыыталлар. Дьахтары көрдөөһүҥҥэ волонтердар кыттыспыттар. Хомойуох иһин, сүппүт дьахтары күн бүгүнүгэр диэри була иликтэр.

Сүппүт дьахтар туһунан туох эмит иһитиннэрии киирдэ даҕаны Өлөөннөөҕү Ис дьыала салаатыгар  +7(964)420-34-92 эбэтэр 8(411) 692-11-62 нүөмэрдэргэ эрийэн билсэр туһунан ИДьМ пресс-сулууспата иһитиннэрэр.

Эрдэ СИА-ҕа Өлөөн улууһун дьаһалтата иһитиннэрбитинэн, кыыс 28 саастаах, үс оҕолоох. Кэргэнэ оскуолаҕа үлэлиир. Ааспыт өрөбүлгэ сүппүт уонна билигин да дьиэтигэр төннө илик. Сэлиэнньэ иһигэр кинини көрдүүр волонтердар ыстааптара тэриллибит.