Өлүөнэ муостатын тутууну хонтуруоллуохтара

Ил Дархан Айсен Николаев РФ генеральнай борокуруорун солбуйааччыта Дмитрий Демешиҥҥэ Өлүөнэ муостатын бырайыагын билиһиннэрдэ.

Дмитрий Демешин бэлиэтииринэн, Өлүөнэни туоруур муоста Саха сирин, бүтүн Уһук Илин, Арассыыйа бүттүүн экэниэмикэтэ сайдарыгар уонна улаатарыгар төһүү күүс буолар. Муоста тутуллан үлэҕэ киирдэҕинэ, тырааныспар сырыыта 22-тэн 87% диэри улаатыахтаах.

Эбийиэк тутуутун тула сүрүн боппуруостары  кэпсэтистилэр. Ол курдук, тутуу үлэтин былаан-кыраапыгын чопчуластылар. Өрөспүүбүлүкэ борокуратууратыгар үлэ хаамыытын, ону таһынан үлэни хаачыстыбалаахтык уонна кэмигэр толорууну хонтуруоллууру сорудахтаатылар. Дмитрий  Демешин олохтоох тутуу тэрилтэлэригэр, үлэһиттэр үлэлиир бырааптарын тутуһууга болҕомтону уурда.