Федеральнай Сабантуй Дьокуускайга Комсомольскай болуоссакка ыытыллыаҕа

Бэс ыйын 13-14 күннэригэр Саха сиригэр үбүлүөйдээх федеральнай ХХІ Сабантуй ыытыллыаҕа.

Бүтүн Арассыыйатааҕы бырааһынньык сүрүн тэрээһиннэрэ Орто дойдуттан көһөрүллэн, Дьокуускайга Комсомольскай болуоссакка ыытыллыахтара. Саха сиригэр «Туган Як» татаар култууратын киинин бэрэссэдээтэлэ Игорь Халилов СИА-ҕа иһитиннэрбитинэн, бырааһынньыгы көһөрүү туһунан быһаарыы тэрийэр кэмитиэт быһаарыытынан ылыныллыбыт.

Итинэн сибээстээн, бырааһынньыкка Дьокуускай олохтоохторо уонна ыалдьыттара  сылдьыахтара, онон кыттар дьон ахсаанын улаатыннарар кыаҕы биэриэҕэ.

«Бырааһынньык миэстэтин уларытыы — муус устар 22 күнүгэр тэрийэр кэмитиэт мунньаҕын кэнниттэн ылыныллыбыт быһаарыы. Элбэх киһини тардар инниттэн куорат пааркатыгар, Комсомольскай болуоссакка уонна «Туймаада» стадиоҥҥа ыытыллара быһаарылынна, — диэтэ Игорь Халилов.

Татарстан култууратын киинин бэрэссэдээтэлэ болуоссакка киирэргэ ааркалаах, алта тематическай дьиэлэрдээх, элеменнардаах улахан инсталляция туруорулларын кэпсээтэ.

Маны таһынан Сабантуй иһинэн Буинскай судаарыстыбаннай драматическай тыйаатыра испэктээк көрдөрүөҕэ, уус-уран норуот маастардарын бэстибээлэ, быыстапкалара, ону тэҥэ успуорт күрэхтэһиилэрэ ыытыллаллар. Бырааһынньыкка 15 тэрээһин ыытыллыаҕа. 1000-тан тахса ыалдьыт кэлэрэ былааннанар.