Гаврил Алексеев: «Үгүс суолталаах боппуруос быһаарылларыгар эрэнэбин»

СӨ Ил Дархана Айсен Николаев Владимир Путины кытта видео-сибээс нөҥүө кэпсэппитин үгүс дьон сэргии ылынна. «Якутскэнерго» ПАО генеральнай дириэктэрэ, Ил Түмэн дьокутаата Гаврил Алексеев санаатын маннык үллэһиннэ:

— Ил Дархан Айсен Николаев дойду бэрэсидьиэнэ Владимир Путины кытта кэпсэтиитин бэркэ кэрэхсээн көрдүм, иһиттим.

Айсен Сергеевич дойду Аҕа баһылыгын таһымыгар Саха сирин энэргиэтикэтин тирээн турар боппуруостарын ырытта. Биһиги салаабытыгар кэккэ уустук кыһалҕалар бааллар. Ол федеральнай сокуоннарга уларыйыылары кытта сибээстээх. Ол иһигэр электроэнергия тарыыбын тэҥнээһин мэхэньиисимин чааһын уларыйыыта эмиэ киирэр. Бүгүҥҥү күҥҥэ
2035 сылга диэри ТОР резиденнэригэр, аччыгый уонна орто биисинэс, ОДьКХ тэрилтэлэригэр электроэнергияҕа «дальневосточнай надбавка» мэхэньиисимин тарыыбын тэҥнээһин боппуруостарын быһаарыыга Арассыыйа салалтатын өйөбүлэ наада. Онон Владимир Владимирович биһиги өрөспүүбүлүкэбитигэр сырыыта бу суолталаах боппуруоһу быһаарыыга улахан суолталаах.

Уһук Илин, ол иһигэр Саха сирэ дойду Аҕа баһылыгын өйөбүлүнэн элбэх инвестиция уонна бырамыысыланнас бырайыактарын олоххо киллэрэн, сайдыы саҥа таһымыгар таҕыстылар. Хаарбах туруктаах дьиэлэр оннуларыгар саҥа социальнай эбийиэктэр тутулуннулар, элбэх оҕолоох дьиэ кэргэттэри көхтөөх өйөбүл оҥоһуллар.

Владимир Путин Саха сиригэр сырыытын кэмигэр уустук усулуобуйалаах эрэгийиэн энергиэтикэтин суолталаах боппуруостарын быһаарыыга болҕомтотун уурарыгар эрэллээхпин.