Горнайга сыл бастыҥ дириэктэрин талаллар

Үчүгэй салайааччыга түбэһэн үлэлээһин – бэйэтэ туспа дьол, табыллыы. Дириҥ билиилээх-көрүүлээх, сатабыллаах салайааччы кэскилгин түстэһэр, аартыккын арыйар киһи диэн мээнэҕэ эппэттэр.

Ол курдук, бүгүн, кулун тутар 20 күнүгэр, Горнай улууһугар оскуола бастыҥ салайааччытын быһаарар «2024 сыл бастыҥ дириэктэрэ» күрэс саҕаланна. Быйылгы күрэскэ 5 дириэктэр бэйэлэрин уопуттарын, ситиһиилэрин, маастарыстыбаларын көрдөрүөхтэрэ, тарҕатыахтара, билиһиннэриэхтэрэ. Тэрээһин аһыллыытыгар кыттааччылары улуус баһылыгын бастакы солбуйааччыта С.С. Стручкова, улуустааҕы үөрэх управлениетын начаалынньыга В.И. Сметанина эҕэрдэлээтилэр, алгыс тылларын анаатылар диэн Горнай улууһун дьаһалтатын пресс-сулууспата иһитиннэрэр.

Быйылгы «Сыл бастыҥ дириэктэрэ» күрэс кыттааччылара кимнээхтэрий? Маҥаны орто оскуолатын дириэктэрэ Ариан Текеянов, Маҕарас орто оскуолатын дириэктэрэ Максим Максимов, Өрт орто оскуолатын дириэктэрэ Прокопий Тимофеев, Күөрэлээх орто оскуолатын дириэктэрэ Василий Тимофеев, Кэптин орто оскуолатын дириэктэрэ Куудук Аман Уран Уола бэйэлэрин хамаандаларын илдьэ кэлэннэр, бүгүҥҥү күҥҥэ илин-кэлин түсүһэ сылдьаллар.

Дьүүллүүр сүбэ 4 түһүмэҕинэн сыаналыаҕа: «Ситиһии формулата» салалта уопутуттан тарҕатыы; «Салайар бырайыак» салайааччы үөрэх тэрилтэтин сайыннарыыга туох үлэ көдьүүстээҕин көрдөрүү; «Маастар-кылаас» идэтинэн маастарыстыбаны көрдөрүү; «Пресс-кэмпириэнсийэ» үөрэх бары кыттыылаахтарын уонна уопсастыбаннай бэрэстэбиитэллэри кытта кэпсэтии.

Санатан эттэххэ, кыайыылаах салайааччы улуус чиэһин өрөспүүбүлүкэҕэ көмүскүү барыаҕа.