Хаҥалас — Дьокуускай хайысхатынан муус ыам ыйын 14-18 күннэригэр хамсыыра сабаҕаланар

Өлүөнэ өрүскэ мууһа Хаҥалас уонна Өлүөхүмэ оройуоннарынан устар. Муус алын кырыыта Хаҥалас Иһит  сэлиэнньэтин аннынан  тиийдэ.  Бу сарсыарда Кытыл Дьураа аннынан муус хойуутук устар диэн СӨ Гражданскай оборуона дьыалаларыгар уонна нэһилиэнньэ олоҕор-дьаһаҕар куттал суох буолуутун хааччыйар министиэристибэ пресс-сулууспата иһитиннэрдэ.

Барыллааһын  быһыытынан Хаҥалас — Дьокуускай аннынан муус ыам ыйын 14-18 күннэригэр, Нам оройуонугар 18-20  күннэригэр хамсыыра сабаҕаланар.

Бэҕэһээ Өлүөхүмэ куораттан  7 км сиргэ  Селивановоҕа  мууһу дэлби тэптэрэр үлэлэр ыытылыннылар. Ол түмүгэр, муус харыыта урусхалланан, муус салгыы уһунна.

Өлүөхүмэҕэ Витим өрүстэн уу тахсыыта бэлиэтэнэр. Дабаан бөһүөлэгин анныгар Витимтэн киирбит уу таһыма 1,5 м тиийбитэ. Бэҕэһээ 5 чаас саҕана уу оннугар түспүтэ.
Кыыллаах, 1-Нөөрүктээйи учаастагар уу 70 см эбиллэ сылдьан баран, оннугар түстэ.  Өлүөхүмэ таһынан уу кыралаан түһэр диэн СӨ Гражданскай оборуона дьыалаларыгар уонна нэһилиэнньэ олоҕор-дьаһаҕар куттал суох буолуутун хааччыйар министиэристибэ пресс-сулууспата иһитиннэрдэ.