Хантараагынан сулууспалыан баҕарааччылары сүүмэрдиир биир кэлим пуун штатнай эрэһииминэн үлэлиир

Хантараагынан байыаннай сулууспаҕа гражданнары сүүмэрдиир биир кэлим киин байыаннай сулууспаҕа хандьыдааттары сүүмэрдииргэ көрдөрүүлэрин былааннаахтык толорон иһэр.

Туһааннаах мэдиссиинэ хамыыһыйатын көрүүтүн аһардан, байыаннай сулууспалаахтар докумуоннарын илии баттааһынын кэнниттэн байыаннай чаастарынан ыыталлар.

Бу туһунан бүгүн муус устар 26 күнүгэр, брифиҥҥэ «Абырал» санаторий кылаабынай бырааһа Алена Иванова иһитиннэрдэ. Кини хантараагынан сулууспалыан баҕарааччыларга бары усулуобуйа тэриллибитин туһунан бэлиэтээтэ.

 «Сулууспалыан баҕарааччылары күн устата түөртэ аһаталлар уонна олорор сирдэринэн хааччыйаллар. Кинилэри анал быраас-исписэлиистэр көрөллөр», — диэтэ Алена Иванова.

Хантараагынан байыаннай сулууспаҕа гражданнары сүүмэрдиир биир кэлим киин сарсыарда 9 чаастан киэһэ 18 чааска диэри үлэлиир. Баҕалаахтары Дьокуускай куорат, Сэргэлээх шоссе 11 км, 1 куорпус аадырыһыгар баар «Абырал» санаторийга күүтэллэр. Бу аадырыска 7 №-дээх оптуобус тиийэр, тохтобула  «Абырал» санаторий.

 СӨ Ил Дарханын уонна Бырабыыталыстыбатын пресс-сулууспата