Хороҕо иһэр ууну, балыыһаны, култуура дьиэтин, гааһы туруорсаллар

Өрөспүүбүлүкэ ситэриилээх былааһын 2023 сыллааҕы түмүгүнэн отчуота Үөһээ Бүлүү улууһугар салҕанар.

Бүгүн ситэриилээх былаас уорганнарын Үөһээ Бүлүү улууһугар үлэлиир бастакы бөлөҕө сарсыардаттан Хоро нэһилиэгин олохтоохторун кытары көрүстэ.
Сиэр быһыытынан тэрээһин Арассыыйа уонна Саха Өрөспүүбүлүкэтин өрөгөй ырыатынан аһылынна. Салгыы бөлөҕү салайан илдьэ сылдьар өрөспүүбүлүкэ экэниэмикэтин миниистирэ Петр Попов Саха сирин социальнай-экэнэмиичэскэй сайдыытын, ааспыт сыллааҕы үлэ-хамнас ситиһиитин туһунан кэпсээтэ.
Хоролорго сүрүннээн иһэр уу кыһалҕата туран, скважина хастарбыттарын, ол гынан баран бу эбийиэк үп тиийбэккэ уота холбоммокко турар, онуоха 4 мөл. солк. наадатын эттилэр, бу кыһалҕаны быһаарарга көрдөстүлэр.
Иккис боппуруоһунан саҥа балыыһаны туттарыы буолла. Билиҥҥитэ балыыһа 11 куойкалаах 1963 с. тутуллубут хаарбах дьиэҕэ олорор. Саас-күһүн өрүс хаайар кэмигэр өрүс уҥуор сытар нэһилиэктэрин Хоро балыыһата эрэ көрөрүн, онон олус суолталааҕын ыйдылар.
Үсүһүнэн, Култуура киинин туруорустулар. Култуура дьиэтэ хаарбах туруктааҕынан билиниллибит, ону Петр Попов ханнык эмэ бырагыраамаҕа киирсэн хамсааһыны түргэтэтэргэ сүбэлээтэ.
Төрдүһүнэн, ходуһа сирин кэтэх хаһаайыстыбаҕа биэрэри уонна мелиоративнай үлэни ыытыыны, шлюз-регуляторы көрүүнү-харайыыны быһаарарга эттилэр.
Хоро нэһилиэгин баһылыга Альберт Иванов үгүс ыал ититэр систиэмэлэрин уот ситимигэр холбоон олороллор, үгүстэрэ кыамматтар, онон субсидияны туруоруста. Кырдьык, ыаллыы сытар Ньурба, Сунтаар улуустарыгар субсидия көрүллэр, оттон тэҥ усулуобуйалаах Үөһээ Бүлүүгэ оннук көрүллүбэт.
Үөһээ Бүлүүлэр гаастаах сир аттыгар олорон гааһа суохтарыттан абараллара баар суол.
Хоро нэһилиэгин олохтооҕо Илья Саввинов бырамыысыланнаһы баһылааһын экологияны буортулуурун, өрүстэр химическэй састааптара уларыйбытын, балык хаачыстыбата мөлтөөбүтүн эттэ.
Николай Кобляков  байыаннай дьайыы кыттыылаахтарыгар көмөнү, болҕомтону ууралларыгар, төннөн кэлбит дьон ускул-тэскил сылдьыбаттарын курдук дьаһал ылыллара буоллар диэн баҕа санаатын эттэ.
Хоро нэһилиэгин олохтоохторо быйыл атын сыллары кытары тэҥнээтэххэ, өрө көтөҕүллүүлээхтик, киэҥ ис хоһоонноохтук ааспытын, тупсубутун, бэйэлэрин идэлэрин баһылаабыт, бары ыйытыыга сөптөөх хоруйу биэрэр исписэлиистэр кэлбиттэрин бэлиэтээтилэр. Көрсүһүү түмүгэр олохтоохтор Бырабыыталыстыба бу сыллааҕы нэһилиэнньэҕэ отчуотун биһирииллэрин бэлиэтээтилэр.