Ил Дархан Айсен Николаев Игорь Юргиҥҥа «Гражданскай килбиэн» бэлиэни туттарда

Ил Дархан Айсен Николаев Арассыыйа дьоруойа, ыччат миниистирин эбээһинэһин толорооччу Игорь Юргинныын көрүстэ. Аҕа баһылык РФ Үөрэҕириитин министиэристибэтигэр саҥа үлэҕэ анаммыт Игорь Юргины ситиһиилээхтик үлэлииригэр алҕаата.

Игорь Юргин — «Время героев» диэн РФ Бэрэсидьиэнэ Владимир Путин көҕүлээһининэн оҥоһуллубут каадыр бырайыагын кыттыылааҕа. Айсен Николаев Игорь Юргиҥҥа стажировкаланар кэмигэр настаабынньыктаабыта.

«Игорь Васильевичка өрөспүүбүлүкэ социальнай-экэнэмиичэскэй сайдыытыгар кылаатын иһин махтанным. «Гражданскай килбиэн» бэлиэни туттардым. Биһиги министиэристибэ күннээҕи үлэтин-хамнаһын, сыал-сорук туһунан кэпсэттибит. Дьоруойбут салгыы төрөөбүт Сахатын сирин аатырда туруо диэн эрэллээхпин», — диэн көрсүһүү түмүгүнэн Айсен Николаев социальнай ситимнэргэ суруйда.

Игорь Юргин Ил Дархан Айсен Николаевка, Саха сирин Бырабыыталыстыбатыгар махтанна.  Маны сэргэ министиэристибэ үлэтин түмүктэрин кэпсээтэ. «Патриот» диэн ыччат киинин «Бригантина» дьиэтигэр арыйыы былаанын туһунан иһитиннэрдэ. Билигин онно өрөмүөн үлэтэ ыытылла турар. Эбийиэк ыччат маассабай былаһааккатынан буолуоҕа.