Ил Дархан «Бэс Чагда» санаторийга байыастары көрүстэ

Улуу Кыайыы күнүн көрсө, ыам ыйын 8 күнүгэр,  Ил Дархан Айсен Николаев «Бэс Чагда» санаторий реабилитационнай киинигэр байыаннай дьайыы кыттыылаахтарын уонна кинилэр дьиэ кэргэттэрин кытта көрүстэ. 

Билигин реабилитационнай кииҥҥэ сэттэ буойуттар доруобуйаларын чөлүгэр түһэрэллэр. Ону таһынан санаторийга хас да байыаннай дьайыы кыттыылаахтарын төрөппүттэрин эмтииллэр. Айсен Николаев байыастары уонна кинилэр дьиэ кэргэттэрин кытары көрсөн, доруобуйаларын уонна өрөспүүбүлүкэ өттүттэн эбии туох көмө оҥоһуллуон сөбүн туоһуласта.

«Биһиги быраастары кытта биир ыал курдук буоллубут! Кинилэргэ улаханнык махтанабыт», — диэтэ Мичил Павлов. Буойун өссө биир эппэрээссийэни ааһыахтааҕын туһунан кэпсээтэ уонна дойдутугар төннөрүн туһунан эттэ.  Сотору кэминэн анаммыт судаарыстыбаннай наҕарадааларын ыларыгар эрэнэрин биллэрдэ. Бааһырыы кэнниттэн реабилитация олус туһалаабытын, билигин туруга биллэ тупсубутун кэпсээтэ. Байыаннай сулууспалаахтар наадыйыыларын туһунан этэр буоллахха, Мичил санаатынан, бааһырбыт байыастары колясканан таһар пандустаах оптуобус наада. Бу боппуруоһу быһаарыынан, ону сэргэ байыастары уонна кинилэр аймахтарыгар тиһиктээх психологическай өйөбүлү тэрийиинэн Саха сирин Биир кэлим координационнай киинэ дьарыктанар. Өктөмҥө биир итинник оптуобус баар эрээри, бүгүн иккис оптуобус наада буолбут. Оттон Константин Охлопков төлөбүрдэр хойутаабыттарын туһунан Ил Дархаҥҥа иһитиннэрдэ. Бу балаһыанньаны Айсен Николаев бэйэтин хонтуруолугар ылла.

Урут санаторийга үлэлии сылдьыбыт Агит Колодезников уонна Игорь Корнилов көҥүл өттүнэн чэбдигирдэр, чөлүгэр түһэрэр кыах баарын, реабилитационнай киин үлэһиттэрин болҕомтолоох сыһыаннарын бэлиэтээтилэр. Агиттан ураты өссө икки «Бэс Чагда» үлэһиттэрэ хантараак түһэрсибиттэр уонна билигин байыаннай дьайыы зонатыгар бааллар. Кинилэр бу санаторийга бырааһынан үлэлээбиттэр. Билигин санаторийга иккис этээскэ, актовай саалаҕа, тахсарга подъемник тиийбэтин бэлиэтээтилэр. «Үчүгэй кэнсиэртэр буолан ааһаллар, биһиэхэ онно тахсар ыарахан», — диэтилэр.

«Бэс Чагда» санаторийга кэнсиэртэри тэрийиинэн культуролог Аида Макарова дьарыктанар. Аида Васильевна Чечня сэриитин огдообото, 2022 сылтан волонтерскай хамсааһынын биир көхтөөх кыттааччыта. «Бастаан утаа бэрэскии, алаадьы астаан, саха уолаттара эмтэнэр госпиталларыгар сылдьарым. Онтон саха- волонтердар көмөлөрүнэн бааһырбыттарга анаан сыттыктары тигиинэн дьарыктаммыт. Оттон санаторийга сынньана кэлбит волонтер Мария Алексеевна Кузьминаны кытта маскировочнай сеткалары тигэр буолбуттар. Сыл устата маны барытын сынньанааччылары кытта бииргэ оҥоробут, ону таһынан байыастарга зона хонуутугар ыытабыт», — диэн кини кэпсээтэ.

Бааһырбыт байыастар ийэлэрэ эмиэ Ил Дархаҥҥа бэйэлэрин санааларын кытта үллэһиннилэр, санаторий генеральнай дириэктэригэр Георгий Трофимовка уонна кылаабынай бырааһыгар уонна Елена Балюрга, ону тэҥэ бары санаторий үлэһиттэригэр махталларын эттилэр.

Түмүккэ Ил Дархан байыастары, кинилэр аймахтарын, санаторий үэһиттэрин Кыайыы күнүнэн эҕэрдэлээтэ уонна доруобуйаны, дьолу-соргуну баҕарда.

СӨ Ил Дарханын уонна Бырабыыталыстыбатын пресс-сулууспата