Ил Дархан Харыйатыгар өрөспүүбүлүкэ 700 үөрэнээччитэ кытынна

Үтүө үгэс быһыытынан, саамай күүтүүлээх-кэтэһиилээх уонна аптаах бырааһынньыкка – Саҥа дьыллааҕы Ил Дархан Харыйатыгар, Судаарыстыбаннай цииркэҕэ өрөспүүбүлүкэ бары улуустарыттан 700 үөрэнээччи муһунна.

“Эһигини, Саха сирин кэскиллэрин эҕэрдэлиибин. Олус үчүгэй, талааннаах ыччат үүнэн эрэриттэн үөрэбин. Үөрэххэ, үлэҕэ, успуорка, култуураҕа ситиһиигитин көрөбүн. Эһиги ситиһиигит – бу биһиги ситиһиибит. Үөрэххитигэр, олимпиадаларга, айар куонкурустарга, билим-быраактыка кэмпириэнсийэлэригэр уонна успуорка күрэхтэһиилэргэ ситиһиилэннэххитинэ, арыйыылары оҥордоххутуна тэҥҥэ үөрэбит”, – диэн Айсен Николаев бэлиэтээтэ.

Ил Дархан 2024 сылы Оҕо саас сылынан биллэрбитин санатта. Эһиилги сылга оҕо аймаҕы өйүүр, үүнэр кэскиллэри сайыннарар уонна көмүскүүр туһугар үгүс хамсааһын ыытыллыаҕа. Өрөспүүбүлүкэ оҕолоро кыһамньыны билэллэрин курдук саҥа оскуолалар уонна култуура дьиэлэрэ тутуллуохтара, успуорт комплекстара үлэҕэ киириэхтэрэ.

Саха сирин оҕолорун билии үрдүк таһымыгар көҕүлүүр инниттэн, Айсен Николаев Бүтүн Арассыыйатааҕы үөрэнээччилэр олимпиадаларын кыайыылаахтарыгар 500 тыһ. солк. уонна финал призердарыгар 100 тыһ. солк. туттарарга быһаарыы ылыммыта. Бу өйөбүл миэрэ тута олоххо киирэр, Ыйаахха номнуо илии баттаммыта. “Билигин бу саалаҕа эһиги кэккэҕитигэр ол призердар баалларын билэбин, эһигини кыайыыгытынан эҕэрдэлиибин, маладьыастар!” – диэн Ил Дархан эттэ.

Үөрүүлээх тэрээһин иитинэн үөрэххэ, успуорка, уопсастыбаннай үлэҕэ, билим-быраактыка кэмпириэнсийэлэрин хас да төгүллээх кыайыылаахтарыгар, Бүтүн Арассыыйатааҕы уонна өрөспүүбүлүкэтээҕи олимпиадалар призердарыгар  — уон үөрэнээччигэ Ил Дархан анал истипиэндьийэтэ туттарылыннылар. 2023 сыл түмүгүнэн өйдөбүнньүк бэлэхтэри маннык стипендиаттар туттулар: Дьокуускайдааҕы кадетскай интэринээт-оскуола 11-с кылааһын үөрэнээччитэ Семен Необутов, Р.Дмитриев аатынан Өрөспүүбүлүкэтээҕи олимпийскай эрэллэр  училищетын 9-с кылааһын үөрэнээччитэ Кристина Дрозд, Өлүөхүмэ куорат 4-с нүөмэрдээх орто оскуолатын 11-с кылааһын үөрэнээччитэ Максим Поповскай, Бүлүү улууһун Тылгыны орто оскуолатын 11-с кылааһын үөрэнээччитэ Виктория Алексеева, Дьокуускай куораттааҕы классическай гимназия 11-с кылааһын үөрэнээччитэ Власий Югов, Абый оскуолатын 10-с кылааһын үөрэнээччитэ Любовь Слепцова, Мэҥэ Хаҥалас улууһун Аллараа Бэстээх оскуолатын 11-с кылааһын үөрэнээччитэ Магомед Наурузов, Ларионов аатынан физика-тиэхэньиичэскэй лиссиэй 10-с кылааһын үөрэнээччитэ Александра Дмитриева, Горнай улууһун Бэрдьигэстээх оскуолатын 11-с кылааһын үөрэнээччитэ Арсен Михайлов, Өймөкөөн улууһун Уус-Ньара гимназиятын 11-с кылааһын үөрэнээччитэ Татьяна Гарипова.

Өрүү буоларыныы үөрэнээччилэргэ Саҥа дьыллааҕы театрализованнай туруорууну көрдөрдүлэр, быйыл “Солнце тундры” диэн ааттаах. Санатан аастахха, Ил Дархан быйылгы Харыйатыгар өрөспүүбүлүкэ бары улуустарыттан уонна куораттааҕы уокуруктарыттан 700 үөрэнээччи ыҥырыллыбыта.

Ил Дархан уонна Бырабыыталыстыба пресс-сулууспата.