Кэмпэндээйигэ Култуура дьиэтэ тутулунна

Дойду Аҕа баһылыга Владимир Путин көҕүлээбит «Култуура» национальнай бырайыагын иитинэн, Сунтаар улууһун Кэмпэндээйи сэлиэнньэтигэр  Култуура дьиэтэ тутулунна.  Култуура дьиэтин кэлэр ыйга үлэҕэ киллэрэр былааннаахтар.

2022 сыл ыам ыйыттан саҕаламмыт тутуу уопсай иэнэ  836,93 кв.  Былаан быһыытынан тутуу үлэтэ ахсынньыга түмүктэммитэ. Онон, сыл бүтүүтэ үлэҕэ киллэрии туһунан көҥүлү ылбыттара. Тутуу үбүлээһинэ  153,4 мөл. солк. ааҕыллар.

Биир мэндиэмэннээх, 150 миэстэлээх кулуупка үҥкүүлүүр саала,  гримернай, куруһуоктарга аналлаах хостор бааллар.

«Владимир Путин көҕүлээбит «Култуура» национальнай бырайыагын көмөтүнэн саҥа Култуура дьиэтэ тутуллубутун таһынан, өссө аныгы оборудованиенан толору хааччылынныбыт. Микрофонтан саҕалаан LED-экраҥҥа тиийэ. Айар куруһуоктарга оҕолор уонна улахан дьон  дьарыктаныахтара.  Билигин саҥа дьиэлэнэн улуустааҕы, өрөспүүбүлүкэтээҕи  таһымнаах тэрээһиннэри ыытар кыахтанныбыт», — диэн Култуура дьиэтин дириэктэрэ   Анна Тотонова санаатын үллэһиннэ.

Национальнай бырайыакка олоҕуран маны таһынан Бүлүү Тыымпытыгар Култуура киинэ  тутулунна. Өссө үс эбийиэк 2024 сылга тутуллара былааннанар: Чурапчы Толоонугар,  Сунтаар Кириэстээҕэр, Мэҥэ Хаҥалас Аллараа Бэстээҕэр.

Санатан эттэххэ,  Владимир Путин көҕүлээбит «Култуура» национальнай бырайыага 2019 сылтан  саҕаламмыта.  Бу кэм иһигэр Саха  сиригэр култуура  45 эбийиэгэ тутулунна. 139 кулууп материальнай-тиэхиньиичэскэй баазата саҥардылынна. Култуура  19 тэрилтэлэригэр хапытаалынай өрөмүөн ыытылынна,  14 модельнай  библиотека  тэрилиннэ.