Киин куорат олохтоохторун субуотунньукка ыҥыраллар

Муус устар 20 күнүгэр Аан дойдутааҕы Ийэ сирин күнүн көрсө «Вода России» Бүтүн Арассыыйатааҕы аахсыйа чэрчитинэн Сайсары Күөлгэ субуотунньук ыытыллыаҕа.

СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтэ баҕалаахтары аахсыйаҕа көхтөөхтүк кытталларыгар ыҥыраллар. Субуотунньукка кыттааччылар сарсыарда 10:00 чаастан «Триумф» успуорт уораҕайын аттыгар мустуохтара.

«Экология хамсааһыннарыгар кыттыы дьиҥнээх тренд буолуохтаах. Бу олохтоох нэһилиэнньэҕэ, урбаанньыттарга, уопсастыбаннай хамсааһыннарга үчүгэй кыах биэрэр», — диэн Саха сирин Экологияҕа министиэристибэтин пресс-сулууспата иһитиннэрдэ.