Куорат олохтоохторо буруоҕа уһугуннулар

Бүгүн сарсыарда, атырдьах ыйын 9 күнүгэр,  Дьокуускай куоракка буруо турда. СӨ Ыксаллаах быһыыга-майгыга министиэристибэ иһитиннэрэринэн, өссө бэҕэһээ киэһэттэн биллибит буруо Кэбээйи улууһуттан ойуур баһаарыттан биллибит буолуон сөп.

Тоҕо диэтэххэ, киин куорат уонна куорат таһынааҕы  нэһилиэктэргэ баһаар суох. Бүгүҥҥү буруо нэдиэлэ бүтүөр диэри туруон сөбүн сабаҕалыыллар.

СӨ Экологияҕа миниистирин солбуйааччы Андрей Коноплев иһитиннэрбитинэн, куоракка буруо тыал үрэр хайысхата уларыйарыттан, Хабаровскай, Амур уонна Уус Маайа баһаардарыттан кэлиэн сөп.

Манна даҕатан эттэххэ, атырдьах ыйын 8 күнүгэр  Саха сиригэр 145 408,2 га уопсай иэннээх 100 ойуур баһаара баар. Кэккэ улуустарга  баһаар куттала эмиэ улахан.