Саха сиригэр термическай аномалиялар булулуннулар

Саха сиригэр чугастааҕы кэмҥэ ураты баһаарынай эрэһиим биллэриллиэҕэ. Маннык быһаарыы сылаас күннэр турбуттарынан уонна бастакы термическай аномалиялар булуллубуттарынан быһаарылынна. Бу туһунан Бырабыыталыстыба бэрэссэдээтэлин бастакы солбуйааччы Дмитрий Садовников иһитиннэрдэ.

Билигин өрөспүүбүлүкэ үрдүнэн 26 термоточка баар, ол иһигэр 12-тэ – Хаҥалас улууһугар.

«Бу баһаар буолбатах, сүрүннээн – оту өртөөһүннэр.  Саха сиригэр өртөөһүн бобуулааҕын бары  билэҕит. Инникитин өртөөһүннэр ландшафтнай уонна ойуур баһаардарыгар диэри улаатыахтарын сөп. Итинтэн нэһилиэнньэлээх пууннарга куттал суоһуур. Арааһа дьон-сэргэ итинник дьайыылар биллибэккэ-көстүбэккэ хаалыахтара диэн эрэнэллэр быһыылаах. Ол эрээри, космическай кэтээн көрүү тугу да кистээбэт. Спутниктар кыра уоту тиийэ көрдөрүөхтэрин сөп. Онтон салгыы эппиэтинэскэ тардыыга туһааннаах уорганнар үлэлииллэр», — диэн ТГ-ханаалыгар Дмитрий Садовников суруйда.

Бырабыыталыстыба бэрэссэдээтэлин бастакы солбуйааччы чуолкайдаабытынан, өртөөһүн Саха сиригэр бобуулаах. Бу күннэргэ хас да киһи итинник дьайыылартан буруйданнылар.

«Саха сирин дьонун-сэргэтин баһаартан сэрэхтээх буолуу быраабылатын тутуһаргытыгар, бу эрэһиим кэмигэр айылҕаҕа сылдьаргытын аҕыйатаргытыгар көрдөһөбүт», — диэтэ кини.

Санатахха, бу иннинэ Ил Дархан Айсен Николаев быйыл өрөспүүбүлүкэҕэ өҥүрүк куйаас сайын буолара күүтүллэринэн, ойуур баһаарын кэмэ турарын сабаҕаланарын туһунан иһитиннэрбитэ.