Кустуурга саҥа хочуолунай тутуллан эрэр

Эбээн Бытантай улууһун Кустуур нэһилиэгэ бу күннэргэ улаханнык сэргэхсийдэ. Ол курдук, саҥа хочуолунай тутуута саҕаланан эрэр. Бу уруккутан олохсуйбут оттук көрүҥнэринэн үлэлиир хочуолунай буолбатах.

Олоччу саҥа бырайыак, саҥа сүүрээн. Ол курдук, маһы дробилкаҕа үлтүрүтэн оттуохтара. Маннык хочуолунайы “СӨ  ОДьКХ” ГУП Дьарҕаалаахха 2019 с. киллэрбитэ. Ону олохтоохтор биһирээбиттэрин иһин, аны Кустуурга  тутуохтара.

— Биһиги нэһилиэкпитигэр бырапыыскалааҕынан 700 киһи олорор. Хоту сиргэ оттук уонна сылааһынан хааччыллыы  сытыы боппуруос буоллаҕа. Онон СӨ Ил Дарханын  Айсен Николаев таһаарбыт ыйааҕынан тутуллар буолбутуттан  бары да үөрэн олоробут. Улууска баһылыгынан үлэлээбит Гаврил Горохов бу кыһалҕаны туруорсан, “СӨ ОДьКХ” ГУП-туун (ген.дир. Чикачев В.С.) сүбэлэһэннэр, дьэ, олоххо киирэр буолла. Суолу баттаһа тутуу матырыйаала тиэрдилиннэ. Барыта былаан быһыытынан бардаҕына, сэтинньи ыйга үлэҕэ киириэҕэ. Урут Кустуурга дэриэбинэ аҥара эрэ хочуолунайга холбонон олорбута, саҥа хочуолунай тутулуннаҕына, дэриэбинэ барыта сылааһынан хааччыллыаҕа, — диэтэ Кустуур баһылыга Роберт Колесов.