Күрэхтэһии сүргэни көтөхтө

Арассыыйаҕа Педагог уонна уһуйааччы, Саха сиригэр – Үлэ, Өлөөҥҥө — эбэҥки тылын сылларынан, “Кэнчээри” оҕону сайыннарар кииҥҥэ оройуон таһымнаах ураты күөн күрэс бэрт сэргэхтик ыытылынна.

Бу уһуйааччы, аҕа сүбэһит Аида Васильевна Николаева сырдык аатын үйэтитэр сыаллаах-соруктаах тэрээһиҥҥэ остуол оонньууларыгар күрэхтэһии буолла диэн оройуон дьаһалтата уонна үөрэх управлениета иһитиннэрэллэр.

Күөн күрэскэ уопсайа сүүрбэ киһи сайаапка биэрэн кыттыбыт. Бары да ох курдук оҥостон, кустук курдук куоһанан, эрдэттэн бэлэмнэнэн кэлэн эрбии тииһин курдук эгил-тэгил эриспиттэр. Түһүлгэҕэ бэйэни билиһиннэрииттэн саҕалаан, дьиэ кэргэн үгэһигэр тиийэ сырдаппыттар, бэртээхэй оҥоһуктарын аҕалан болҕомтону тардыбыттар, көрөөччүлэри сөхтөрбүттэр.

Түмүккэ Гран-при үрдүк аатын “Кэнчээри” уһуйаантан кыттыбыт  Екатерина Степанова ылбыт. Бастакы миэстэҕэ “Тугутчаан” уһуйаан иитээччитэ Евгения Стрекаловская тахсыбыт.  Иккис бочуоттаах миэстэни  Аксиния Иванова (“Чипичакан”) ылбыт.  Үһүскэ Августина Николаева тиксибит. Николаевтар дьиэ кэргэн анал бириэмийэлэринэн Сардаана Христофорова наҕараадаламмыт.

“Наһаа интэриэһинэй үлэлэри көрдүбүт. Остуолга уурар киэргэллэр, хаһаайыстыбатаҕа туттуллар тэриллэр. Барыта ис сүрэхтэн оҥоһуллубуттар”, — диэн сыаналыыллар дьүүллүүр сүбэҕэ үлэлээбит олохтоох дьаһалта исписэлииһэ А.А.Николаев, “Кэнчээри” оҕону сайыннарар киин сэбиэдиссэйэ А.Т.Петрова. Сэргэх тэрээһинтэн дьон-сэргэ астынан тарҕаспыт.

Хаартыскаҕа Арина Николаева түһэриитэ