Ситэриилээх былаас отчуота Үөһээ Бүлүү улууһугар иккис күнүн салҕанар. Бастакы отчуоттуур бөлөх бүгүн үлэтин кырыы сытар Кырыкый нэһилиэгиттэн саҕалаата. Кырыкый нэһилиэгэ улуус кииниттэн 90 км тэйиччи сытар, суола-ииһэ мөлтөх. Сиринэн суол кыһын эрэ баар, сайынын сөмөлүөт көтөр. Иллэрээ сыл тахсыбыт улахан ойуур баһаара Дүллүкүттэн кэлэр суол кытыытын бүтүннүү сиэн, кыһыҥҥы да суолу алдьатан, оллор-боллур түспүт.
Нэһилиэнньэтин ахсаана 500-чэ, ол эрээри кыһынын 200-н тахса эрэ олорор. Нэһилиэк эти-үүтү оҥоруунан, ынах сүөһүнү, сылгыны иитиинэн дьарыктанар. Орто оскуолаҕа 30-ча оҕо үөрэнэр, оҕо уһуйааныгар 20-чэ оҕо сылдьар. «Тыа сирин 2020-2025 сылларга кэлим сайыннарыы» өрөспүүбүлүкэтээҕи судаарыстыбаннай бырагырааманан былырыын сыл бүтүүтэ үлэҕэ киирбит успуорт-култуура комплекса баар. Сайыҥҥы уу ситимэ ыал аайы киирбит. Кэнники икки сылга нэһилиэк улахан аҥарын киин ититэр систиэмэҕэ холбообуттар, аны 30-ча ыал холбоноро хаалбыт. Инньэ гынан олохтоохтор абыраммыттар.
Оробуочай бөлөх Кырыкый сэлиэнньэтин олохтоохторугар 2022 сыллаах үлэлэрин отчуоттаата. Ол кэннэ тута олохтоохтор ыйытыыларыгар эппиэттээтэ. Олохтоохтор сүрүннээн суол суоҕун, сибээс мөлтөҕүн, оҕо уһуйаана тутуллуутун, ынах сүөһү төбөтүгэр субсидия көрүллүүтүн, скважина тутуутун, быраас, биэлсэр суоҕун этиннилэр. Бу кыра нэһилиэккэ ыт боппуруоһа эмиэ кыһалҕа буолбут. Дьиҥэ, нэһилиэк бэйэтэ хайдах баҕарар быһаарар кыахтаах. Дэриэбинэҕэ бары хаһаайыннаах ыттар, ол аата эппиэтинэһи кини сүгүөхтээх.
Оттон суол-иис бырайыагын оҥотторон, анал бырагыраамаҕа киллэрэллэригэр сүбэлээтилэр. Биэлсэр-акушер пуунугар «Земскэй доктор» бырагырааманан исписэлииһинэн хааччыйарга көмөлөһүөхпүт диэн бөлөх чилиэннэрэ эттилэр.
Кырыкыйга эмиэ, бу эҥэр барыларыгар курдук, өртөөһүн боппуруоһа сытыытык турар. Сир-уот лаҥханан бүрүллэн, өртөөһүнү туруорсаллар. Онно улуус баһылыга Владимир Поскачин сокуонунан хааччахтааһын баар эрээри, Үөһээ Бүлүү уонна Хаҥалас улуустарыгар научнай эспэримиэн быһыытынан өртөөһүн ыытыллыан сөп диэн эрэл кыымын сахта.
Мунньах түмүгэр нэһилиэк баһылыга Сергей Сергеев дьаһалта исписэлииһин хамнаһын үрдэтэргэ туруоруста. Тоҕо диэтэххэ, нэһилиэк кыһалҕата элбэх, ону быһаарыы, докумуонун толоруу, кэтээн көрөр уорганнар, борокуратуура ирдэбилин, отчуоту оҥорууну барытын биир исписэлиискэ соҥнуур сатабыла суох диэтэ кини. Ону улуус баһылыга эмиэ өйөөтө.
Кытыы сытар Кырыкый нэһилиэгэ Бырабыыталыстыба отчуотун биһириирин биллэрдэ.
Бүгүн, ыам ыйын 6 күнүттэн, Саха сиригэр «Өлбөт үйэлээх полк» аахсыйа саҕаланна диэн СӨ Бырабыыталыстыбатын…
Бүтүн Арассыыйатааҕы "Тиэргэнинэн ыллыыбыт" аахсыйа чэрчитинэн, ыам ыйын 6 күнүгэр Дьокуускайга олорор сэрии бэтэрээннэрин эҕэрдэлээтилэр.…
Улуу Кыайыы 79 сылын туолар үөрүүлээх күнэ чугаһаан иһэр. Аҕыйах хонугунан Кыайыы күнүн, эйэлээх олох…
Быйыл ыам ыйын 1 күнүттэн ахсынньы 30 күнүгэр диэри «Дальний Восток – Земля приключений» Бүтүн…
Саха сиригэр Ил Дархан ыйааҕар уонна да атын дьаһалларыгар сөп түбэһиннэрэн байыаннай дьайыы кыттыылаахтарыгар уонна…
Үгэс быһыытынан норуот синоптига Тускул ыам ыйын билгэлээтэ. ИЛИН ЭҤЭЭР УЛУУСТАР Ыам ыйа илин эҥээр…