Салгыы
«Кыталыктаах кырдалым» киинэ «Золотой ворон» бэстибээлгэ кыайда

«Кыталыктаах кырдалым» киинэ «Золотой ворон» бэстибээлгэ кыайда

22.04.2024, 13:41
Хаартыска: Я.Байгожаева.
Бөлөххө киир:

Саха киинэтэ өссө биир үрдэли дабайда. «Золотой ворон» диэн  VIII Арктикатааҕы норуоттар икки ардыларынааҕы киинэ бэстибээлигэр Гран-при аатын режиссер Михаил Лукачевскай «Кыталыктаах кырдалым» киинэтэ ылла. Маны тэҥэ, сүрүн дьоруойу оонньообут, 10 саастаах Миша Слепцовка анал бириис туттарылынна.

Хаартыска: Я.Байгожаева.

Бу киинэ Иван Дьячковскай-Кыталык Уйбаан «Кустугу ситтэрбиэн» диэн кинигэтинэн, кини оҕо сааһын туһунан суруйууга олоҕуран, уһуллубут. Ийэтин сүтэрбит босхоҥ оҕо кыталыктары көрүөн, ыра санаата туолуон баҕарарын туһунан.

Кыталык Уйбаан бэйэтин олоҕун туһунан ахтыы-кинигэтэ бастаан «Эдэр саас» хаһыакка бэчээттэммитэ. Ааҕааччылар нүөмэр ахсын тахсарын сериал курдук кэтэһэн, утаппыттыы ааҕаллара. Ол курдук уратытык, интэриэһинэйдик суруйар этэ. Кэлин кинигэ буолан тахсыбыта. Дьэ, оттон киинэтэ көрөөччүгэ тахса да илигинэ, улахан ситиһиилэннэ.

Харатыска: Я.Байгожаева.

«Золотой ворон» киинэ бэстибээлэ Арассыыйа кинематографистарын Сойууһун өйөбүлүнэн, Чукоткаҕа Анадырь куоракка муус устар 15-28 күннэригэр буолла. Бэстибээл уус-уран салайааччыта Филипп Абрютин этэринэн, быйыл куонкуруска муҥутуур элбэх сайаапка киирбит — 126 дойдуттан 3600 сайаапка. Онтон Гран-при аатын ылбыт киинэни дьүүллүүр сүбэ талбыт 11 бастыҥ киинэтиттэн көрөөччүлэр талан ылбыттар.

Бэстибээлгэ кыра оҕо оонньуурун бэлиэтээбиттэрэ кэрэхсэбиллээх. 10 саастаах Миша Слепцов «Золотой ворон» анал мэтээли ылан, үөрүүтэ муҥура суох. Миша Амма улууһун Чакыр нэһилиэгэр олорор, үөрэнэр. Маны тэҥэ, «Кыталыктаах кырдалым» киинэҕэ ырыа айааччы Валерий Ноев оруолун оонньообут Алексей Егоров-Өркөн эмиэ анал бирииһи ылла.

«Кыталыктаах кырдалым» киинэ муус устар 25 күнүттэн улахан экраҥҥа тахсыаҕа. Дьиэ кэргэн сылыгар ааспыт үйэ 60-с сылларын ураты тыынын, оҕолор сырдык эйгэлэрин, аҕа-уол сыһыаннарын, дьулуур, баҕа санаа күүһүн, дьиэ кэргэн туһунан киинэ тахсыбыта олус үчүгэй. 

+1
6
+1
0
+1
0
+1
0
+1
0
+1
0
+1
0
Бары сонуннар
Салгыы
22 июня
  • 14°C
  • Ощущается: 13°Влажность: 77% Скорость ветра: 0 м/с

Сообщить об опечатке

Текст, который будет отправлен нашим редакторам: