Ленин болуоссатыгар каток оҥоһуллар

Дьокуускайга Ленин болуоссатыгар саҥа дьыллааҕы харыйаны күн бэҕэһээ эрэ хомуйбуттара. Ону тэҥэ, бүгүн, олунньу 16 күнүгэр тута кэриэтэ сааскы катогу оҥорон киирэн бардылар.

“Водоканал” тэрилтэ үлэһитэ СИА кэрэспэдьиэнигэр иһитиннэрбитинэн, каток аныгыс нэдиэлэттэн үлэлээн саҕалыахтаах. Урукку сылларга курдук, муус каток иэнэ тыһыынчаттан тахса кв. миэтэрэҕэ тэҥнэһиэ. Дьэ, күн уһаан, сылыйан, сааскылыы чаҕылхайдык тыган, хаҥкылыырга бэртээхэй күн-дьыл буолан эрэр.

Оттон Сайсары күөлгэ муоста аннынан каток олунньу 14 күнүттэн үлэтин номнуо саҕалаабыта. Олунньу 17 күнүттэн «Северное Сияние» муус пааркаҕа, олунньу 18 күнүгэр Таалай күөлгэ катоктар үлэлиэхтэрэ. Өссө атын сирдэргэ кулун тутар саҥатыттан аһыллаллара былааннанар.