Марта Винокурова: «Биир сыаллаах буолуохтаахпыт – оҕолорбут сылаастык таҥна сылдьалларын хааччыйыы»

«Саха сирэ эйигин кытта» өрөспүүбүлүкэтээҕи уопсастыбаннай хамсааһын ыстаабын иистэнэр сыаҕар күн аайы амарах санаалаах далбар хотуттар байыаннай дьайыыга сылдьар байыастарга таҥастары тигэллэр, маскировочнай сиэккэлэри баайаллар, харысхаллары, окуопа чүмэчилэрин оҥороллор, аадырыстаах баһыылкалары ыыталлар.

Уолаттарбыт томмокко-хаппакка сылдьалларын туһугар бары көмөлөһүөхтээхпит диир иистэнньэҥ Марта Винокурова:

— Мин манна олунньуттан кэлэн көмөлөһөбүн. Нам улууһун Хатырыгыттан төрүттээхпин, куоракка олорбутум ыраатта. Биэнсийэҕэ тахсан олоробун, онон нэдиэлэ аайы манна кэлэн иистэнэбин. Билигин биһиги күн-дьыл уларыйыытыгар флис таҥастан көстүүмнэри тигэбит. Кэмпилиэкпит кээнчэлээх уонна бэргэһэлээх буолла. Билиҥҥи уустук кэмҥэ биһиги бары биир сыаллаах буолуохтаахпыт – оҕолорбут байыаннай дьайыыга сылаастык таҥна, харыстана сылдьалларын хааччыйыы. Уолаттарбыт этэҥҥэ тоҥмокко-хаппакка сылдьалларын туһугар бары көмөлөһүөхпүтүн наада, онон атыттары эмиэ ыҥырабын.