Мэҥэ Хаҥалас улууһун салайааччылара үлэ нэдиэлэтин олоҥхонон саҕалаатылар

Бүгүн Мэҥэ Хаҥалас улууһун дьаһалтатыгар үлэ саҥа нэдиэлэтэ бэрт  уратытык саҕаланна.

Улуустааҕы дьаһалта пресс-сулууспата иһитиннэрбитинэн, нэдиэлэтээҕи планерка кэмигэр «Олоҥхо дьиэтэ» норуот айымньытын киинин фольклорга исписэлииһэ, олоҥхону утумнааччы Аксинья Степанова олоҥхоттон быһа тардыыны толоруутун  дьон  сэргээн иһиттэ. Улуус салаайааччылара бу күн сахалыы таҥнан кэллилэр. Төрүөтэ — улууска сэтинньи 1 күнүттэн Олоҥхо ыйа саҕаламмыта. Онон араас тэрээһиннэр, күрэхтэһиилэр буола тураллар.  Олоҥхо дьиэтэ тэриллибитэ үбүлүөйдээх 10 сылынан ахсынньы 4-5 күннэригэр эрэгийиэннэр икки ардыларынааҕы форум, ыччат бэстибээлэ ыытыллыаҕа.

Онон бүгүн салайааччылар планеркалара уратытык ыытыллыыта — Олоҥхо ыйын биир суолталаах тэрээһинэ.