«Муравьев-Амурскай 2030» бырагыраама төрдүс ботуогар Саха сириттэн 174 сайаапка киирдэ

Саха сирин олохтоохторо «Муравьев-Амурскай 2030» бырагыраама төрдүс ботуогар 174 сайаапканы биэрдилэр.

Саҥа ботуокка киирбит сайаапка уопсай ахсаана – 5311, бу былырыыҥҥытааҕар 15%-нан үрдүк. Регистрацияламмыттарын ахсаанынан инники күөҥҥэ Москва, Приморскай кыраай, Хабаровскай кыраай, Саха сирэ, Бурятия, Сахалин таҕыстылар.

Уһук Илиҥҥэ уонна Арктикаҕа судаарыстыбаннай сулууспалаах салайар каадырдары бэлэмниир бырагыраама куонкуруһугар биир миэстэҕэ 88 киһи буолла. Дойду 89 эрэгийиэниттэн барытыттан сайаапкалар киирдилэр.

“Кыттыыга сайаапканы биэрии – бу саҕалааһын эрэ. Элбэх талар түһүмэҕи ааһаҕын. Дистанционнай түһүмэххэ видеовизитканы таһынан, хандьытааттар тестированиены ааһыахтара, олор быйыл эбии сыанабыл блоктарынан уустугурдулар. Бу салайааччы буолар кыаҕы быһаарыыга уонна сыаннастары бэрэбиэркэлииргэ туһуланар. Үгэс быһыытынан, бырагыраамаҕа 65-тэн элбэх курсант ылыллыбат.  Уһук Илини уонна Арктиканы сайыннарарга чахчы бэлэмнээх дьону күүтэбит», — диэн “Муравьев-Амурскай 2030” бырагыраама салайааччыта Ксения Кишкарева эттэ.

Бэрэбиэркэлэр түмүктэринэн, бастыҥнары биир сыллаах үөрэх бырагыраамата кэтэһэр, ону кытта Арассыыйа Уһук Илиҥҥи уонна Арктическай зонатыгар баар эрэгийиэннэр судаарыстыбаннай структураларын үлэтин толору билсиэхтэрэ, диэн иһитиннэрэр Ил Дархан, бырабыыталыстыба пресс-сулууспата.