Национальнай бырайыактар тыа сирэ сайдарыгар улахан суолталаахтар

Арассыыйаҕа национальнай бырайыак үтүө түмүгэ ырылхайдык көстөр. Куораттары, тыа сирдэрин барытын хабар. Саха сирэ 12 национальнай бырайыакка кыттар. Нэһилиэнньэ күннээҕи олоҕун-дьаһаҕын барытын хабар.

Амма улууһун баһылыга Степан Кузьмин: “Тыа хаһаайыстыбатын эйгэтигэр национальнай бырайыак “Тыа сирин кэлимник сайыннарыы” бырагырааматын чэрчитинэн, биһиги улууспутугар икки улахан баараҕай эбийиэк тутуллар – Соморсун уонна Алтан нэһилиэктэригэр култуура дьиэлэрэ. Итини таһынан, суол оҥоһуллуохтаах.

Олохтоох бырагыраамаларынан былырыын барыта 16 тиэхиньикэни ылан, хаһаайыстыбаларбытыгар түҥэттибит, Покровка уонна Абаҕа нэһилиэктэригэр бурдук ыскылааттарын, Чакыр нэһилиэгэр 120 төбө киирэр хотонун үлэлэттибит. Ону таһынан, сыллата сылгы баазалара тутуллаллар.

Быйыл “Олох уонна куорат эйгэтэ” национальнай бырайыак “Ыраас уу” федеральнай бырайыак чэрчитинэн, улуус киинигэр Аммаҕа ууну ыраастыыр ыстаансыйа комплекса үлэҕэ киирдэ. Былырыыҥҥыттан эмиэ тустаах бырайыагынан Алтан нэһилиэгэр ыстаансыйа тутулла турар. Быйылгыттан суол тутуута саҕаланар, 2027 сылга диэри оҥоһуллуохтаах. Нэһилэктэргэ хочуолунайдар тутуллаллар.

Мэдиссиинэ хайысхатыгар “Доруобуйа” национальнай бырайыагынан биир бөдөҥ тутуу бара турар – Амма нэһилиэгэр үс мэндиэмэннээх поликлиника. Былаан быһыытынан эһиил үлэҕэ киириэхтээх. Национальнай бырайыагынан түөрт тиэхиньикэни ыллыбыт. Ол курдук, “ПАЗ” оптуобуска олохтоммут комплекс, суһал көмө массыыналара буолаллар.

Итини таһынан, национальнай уонна атын да бырайыактарынан, бырагыраамаларынан үлэ салгыы барар” – диэн кылгастык кэпсиир.