Ньурба улууһун Антоновкатыгар саҥа кулууп тутуллар

Ньурба улууһун Антоновка нэһилиэгэр саҥа кулууп  тутуллар. Номнуо олунньу ыйыттан тутуу ыытыллар учаастагын хаара ыраастаммыта, наадалаах тутуу матырыйаала аҕалыллыбыта.

«Тутуу матырыйаала 70% аҕалыллыбыта. Ол курдук, дьиэ тас өттүн сылааһы тутар бүрүөһүнэ, каркааһа, фасаднай керамогранит, ис өттүгэр облицовочнай билиитэлэр, линолеум, түннүк, ис-тас ааннар, уот матырыйаала, о.д.а. Ону кытта сыаналаах оборудованиелар: 50 кВт дизельнай ыстаансыйа, көһө сылдьар уу ыраастыыр дьиэтэ, септик, баһаарынай емкостар.

Билигин үс үлэһит эбийиэк тас бүрүөһүнүгэр үлэлии сылдьаллар. Ыам ыйыгар саҥа кулууп ис өттүгэр 15-чэ тутааччы үлэлиэҕэ. Билигин Дьокуускайга миграционнай хайысхаҕа кыра уустуктар бааллар. Ол кэннэ эмиэ эбиллиэхтэрэ«, — диэтэ «Региональное развитие» ХЭТ кылаабынай инженера Артем Тимофеев. Бу тэрилтэ улууска хас да эбийиэктээх, үлэтэ таһымнааҕынан улууска бары билэллэр. Ону тэҥэ биир дойдулаахпыт Артем Владимирович үлэлэһэриттэн эрэли бөҕөргөтөр диэн Октябрьскай нэһилиэк дьаһалтатын пресс-киинэ иһитиннэрэр.