Нерюнгрига быйыл аан дойдутааҕы уонна Бүтүн Арассыыйатааҕы улахан тэрээһиннэр буолуохтара

Ил Дархан Айсен Николаев Нерюнгрига тиийэн, тэрээһиннэргэ бэлэмнэнии үлэ хайдах-туох ыытылла турарынан сүбэ мунньаҕы ыытта.  

Бу тэрээһиннэртэн биирдэстэринэн Норуоттар икки ардыларынааҕы “Бакалдын” эбэҥки бырааһынньыга буолар, тэрээһин Нерюнгри оройуонун көҕүлээһининэн ыытыллар. Бырааһынньык Арассыыйа норуоттарын сомоҕолоһуутун уонна Саха сиригэр Култуура сылларын чэрчитинэн ыытыллыаҕа уонна эбэҥки норуотун тылын, үгэстэрин, олохторун-дьаһахтарын кичэллээхтик харыстыыр ​​Иенгра эбэҥки сэлиэнньэтэ төрүттэммитэ 100 сылыгар ананыаҕа. Манна «Икэнипкэ» уонна «Хуктывун» (Табаһыт күнэ) курдук национальнай бырааһынньыктар куруутун ыытыллаллар.

Тэрээһини бэс ыйын 18-20 күннэригэр Нерюнгрига ыытыахха диэн оройуон баһылыга Роман Щегельняк этии киллэрбитэ. Ону таһынан эбэҥкилэр олорор Арассыыйа 10 эрэгийиэннэриттэн бэрэстэбиитэллэр, ону тэҥэ Кытайтан уонна Монголияттан дэлэгээссийэлэр кытталлара күүтүллэр.

Өссө биир улахан тэрээһин — кулун тутар 21-22 күннэригэр Нерюнгрига ыытыллыахтаах мас тардыһыыга Арассыыйа чөмпүйэнээтигэр бэлэмнэнии туһунан эмиэ кэпсэтии буолла. Ил Дархан “Горняк” спортивнай комплекска туох баар үлэ барыта кэмигэр түмүктэнэрин уонна күрэхтэһиини тэрийиини, ол иһигэр олордууну, тырааныспары, кыттааччылар куттала суох буолууларын хонтуруоллууру сорудахтаата.

“Нерюнгри оройуона үрдүк таһымнаах тэрээһиннэри ыытарга бэлэмин дакаастаабыта. Манна 2025 сылга Олоҥхо ыһыаҕа үрдүк таһымҥа ыытыллыбыта. Быйыл да былааннаммыт бары тэрээһиннэр  үрдүк таһымнаахтык ыытыллалларыгар бигэ эрэллээхпин. Бөдөҥ аан дойдутааҕы уонна Арассыыйа таһымнаах тэрээһиннэр Дьокуускайга эрэ буолбакка , оройуоннарга эмиэ барыахтаахтар. Бу эрэгийиэн сайдыытыгар саҥа кыахтары үөскэтэр уонна дьон олоҕун хаачыстыбатыгар быһаччы дьайар”, — диэн Айсен Николаев тоһоҕолоон бэлиэтээтэ.