Нерюнгрига оскуола оҕолорун ортотугар дрон күрэһин кыайыылаахтара билиннилэр

Нерюнгрига оскуола оҕолорун ортотугар дрон күрэһэ буолан ааста. Тэрийээччилэр иһитиннэрбиттэринэн, күрэхтэһии «ИнжеНерю» диэн инженерия үөрэҕин уонна идэҕэ туһаайыы пуорумун чэрчитинэн ыытылынна.

Тэрээһин икки көрүҥнээх күрэхтэһиилээх буолла: DCL тэхиниичэскэй симуляторга хамаанданан көтүү уонна TinyWhoop кылаастаах FPV-дроннарынан биирдиилээн күрэс. Симуляторга ыытыллыбыт хамаанданан күрэхтэһиигэ Нерюнгри оройуонун үөрэх тэрилтэлэриттэн 14 хамаанда, ону таһынан Тында куораттан уонна Нам улууһуттан бэрэстэбиитэллэр кытыннылар.

«Хас биирдии хамаандаҕа иккилии пилот — уол уонна кыыс баара. Кыргыттарга  судургу трассалартан иккитэ, оттон уолаттарга — орто уустуктаах каарталартан иккитэ талыллыбыта. Хас биирдии трассаҕа 30 мүнүүтэ бэриллибитэ: 10 мүнүүтэ эрчиллэр көтүүгэ, 20 мүнүүтэ — түмүк көтүүгэ. Кыайыылаахтар бириэмэтинэн быһаарылыннылар», — диэн күрэхтэһии тэрийээччилэрэ иһитиннэрдилэр.

Тыҥааһыннаах киирсии түмүгүнэн миэстэлэр маннык үллэһилиннилэр:

• 1 миэстэ — Нам 1 №-дээх оскуолатын хамаандата (Сахамир Попов уонна Сардаана Сутакова);
• 2 миэстэ — Нерюнгри к. 18 №-дээх оскуолатын хамаандата (Тимофей Федоров уонна София Рыбакова);
• 3 миэстэ — Нерюнгри к. 24 №-дээх ИТЛ хамаандата (Айаал Васильев уонна Анна Ёлкина).

Күрэхтэһии иккис көрүҥэ — лиссиэй  успуорка саалатыгар ыытыллыбыт TinyWhoop FPV-дроннарынан күрэс  эмиэ олус кэрэхсэбиллээх буолла. Манна алта эдэр пилот күөн көрүстэ. Биирдиилээн бастыыр иһин киирсиигэ Нам 1 №-дээх оскуолатын үөрэнээччитэ Сардаана Сутакова бастыҥынан ааттанна. Кини трассаны эрэллээхтик ааһан, дрону салайар үрдүк таһымын көрдөрдө.

Сардаана ону таһынан Москва мээрин куубагар үс мэтээли ылбыта, биирдиилээн уонна хамаанданан бастыыр иһин киирсиилэргэ боруонса призер буолбута. Тэрийээччилэр бэлиэтииллэринэн, дрон күрэһигэр интэриэс түргэнник үүнэр. Маннык тэрээһиннэр Саха сирин тэхиниичэскэй хамсааһынын суолталаах тэрээһинэ уолан, оскуола оҕолоругар пилоттааһын, инженердии толкуйдааһын уонна хамаанданан үлэлиир үөрүйэхтэрин сайыннарарга көмөлөһөллөр. Нерюнгри эдэр ыччат пилота суох көтүтэр аппарааттарга успуорт сайдар биир сүрүн киинин быһыытынан миэстэтин чиҥэтэн иһэр. Кыайыылаахтар тэрээһин спонсордарыттан — Саха сирин «Кэлэр кэнчээри ыччатын тус сыаллаах пуондатыттан» уонна «ЭльгаУголь» хампаанньаттан  дьупулуомнары уонна бэлэхтэри туттулар.