Новгородовтар “Арассыыйа династията” куонкурус “Дьиэ кэргэн талаана” номинациятыгар бастаатылар

Чурапчы улууһуттан элбэх оҕолоох Новгородовтар дьиэ кэргэн Саха сирин аатыттан Москваҕа ыытыллыбыт Бүтүн Арассыыйатааҕы “Родные — Любимые” дьиэ кэргэн пуорумугар кытынна. Куонкурус бэрэсидьиэн Владимир Путин Арассыыйаҕа биллэрбит Дьиэ кэргэн сылын бастакы официальнай тэрээһининэн буолар.

Новгородовтар пуорум иитинэн “Арассыыйа династията” куонкуруска кыттан “Дьиэ кэргэн талаана” номинацияҕа кыайыылааҕынан таҕыстылар. Дьиэ кэргэн Арассыыйа устун айанныырга сэртипикээтинэн наҕараадаланна.

“Пуорумҥа кыттан элбэх саҥаны биллибит, бары маастар-кылаастарга, лиэксийэлэргэ сэҥээрэн сырыттыбыт, атын эрэгийиэннэртэн сылдьар дьиэ кэргэттэри кытта билистибит, “Арассыыйа династията” куонкуруска кыттан бэйэбит норуоппут култууратын билиһиннэрдибит. Уонна саамай сүрүнэ “Родные – Любимые” Бүтүн Арассыыйатааҕы дьиэ кэргэн пуорумугар дойду бэрэсидьиэнэ Владимир Владимирович Путины кытта көрүстүбүт. Ону таһынан, норуоттар икки ардыларынааҕы “Арасссыыйа” быыстапка-пуорумҥа Саха сирин Ил Дархана Айсен Николаевы кытта көрсүһүү буолла”, — диэн ыал аҕата Айал Новгородов кэпсиир.

Айал уонна Валентина Новгородовтар сэттэ оҕолоохтор, өрөспүүбүлүкэ биир киэн туттар ыала буолаллар. Арассыыйа бэрэсидьиэнин Ыйааҕынан “Төрөппүт албан аата” уордьанынан уонна “Ийэ албан аата”, “СӨ дьиэ кэргэн бэлиитикэтин сайыннарыыга кылааттарын иһин” бэлиэлэринэн, уо.д.а. наҕараадаламмыттара.

Айал Прокопьевич уонна Валентина Ревовна номнуо 20 сыл А.В. Посельскай аатынан Дириҥнээҕи оҕо ускуустубатын оскулатыгар таһаарыылаахтык үлэлииллэр. Оҕолорун тапталынан, харыстабылынан иитэллэр, кыра эрдэхтэриттэн дойдуга тапталы иҥэрэн, үлэҕэ, култуураҕа, успуорка сыһыаран иитэллэр. Куонкуруска кыттыбыттарыттан олус үөрбүттэр, ордук атын эрэгийиэн дьиэ кэргэттэрин кытта билсибиттэриттэн. Москваны аан маҥнай көрбүт оҕолоро олохторун биир үтүө өйдөбүлүн быһыытынан өйдөөн-санаан хаалыахтара.

Новгородовтар пуорумҥа толору састаабынан кытыннылар – Айал уонна Валентина, сэттэ оҕолоро, сиэннэрэ, эбэлэрэ уонна күтүөттэрэ. Бу Новгородовтар дьиэ кэргэн түөрт көлүөнэ дьоно буолаллар.

Айал, Валентина Новгородовтар куонкуруска оҕолорун кытта алгыс сиэрин-туомун көрдөрбүттэр, тута тойук айан иһитиннэрбиттэр уонна оһуокайдаабыттар.

Новгородовтар Москваттан Дьокуускайга бүгүн, тохсунньу 26 күнүгэр көтөн кэллилэр. Кинилэри аэропорка Үлэ уонна социальнай сайдыы миниистирэ Елена Волкова үөрүүлээх быһыыга-майгыга көрүстэ. Дьиэ кэргэни Бүтүн Арассыыйатааҕы “Родные — Любимые” пуорумҥа уонна “Арассыыйа династията” куонкуруска ситиһиилээхтик кыттыбыттарынан эҕэрдэлээтэ. “Биһиги элбэх оҕолоох ыалбыт Новгородовтар дьиэ кэргэн, дойду бэрэсидьиэнэ Владимир Путин Арассыыйаҕа Дьиэ кэргэн сылын биллэрбит “Родные — Любимые” пуорумугар, Саха сирин аатыттан ситиһиилээхтик кытынна. Пуорум хас биирдии эрэгийиэнтэн бастыҥ талааннаах дьиэ кэргэн бэйэтин култууратын, устуоруйатын билиһиннэрэр  кэнсиэпсийэлээх ыытылынна. Новгородовтар чаҕылхайдык кытыннылар, “Арассыыйа династията” куонкурус номинациятыгар бастаатылар уонна дьиэ кэргэнинэн Арассыыйа устун айанныырга сэртипикээтинэн наҕараадаланнылар”, — диэн Елена Волкова бэлиэтээтэ.

Ил Дархан уонна Бырабыыталыстыба пресс-сулууспата.