«Оҕо төрөтүөхпүтүн баҕарабыт да, кыаллыбат…”

Уус Алдан Оройуоннааҕы киин балыыһатыгар оҕо төрөтөргө былааннанар дьиэ кэргэттэргэ аһаҕас аан күннэрэ буолан ааста. Тэрээһин РФ бэрэсидьиэнэ Владимир Путин  биллэрбит Дьиэ кэргэн сылыгар ананна.

Уонтан тахса дьиэ кэргэн гинеколог-бырааска кэлэн сүбэ-ама, анаалыстары туттарарга направление ылла, ону таһынан салгыы эмтэнии, мэдиссиинэ тэрилтэлэригэр дириҥ чинчийиилэри ааһыы   хаамыытын дьүүллэстэ.

«Кэргэнниилэр олохторун хайа эрэ түһүмэҕэр кэлэн, кинилэр толору дьоллоох буолуохтарын биир эрэ тиийбэтин (оҕолоро суох) өйдүүллэр. Ол гынан баран, үксүгэр дьахтар киһиэхэ оҕо үөскүү охсубат. Хомойуох иһин, биһиги кэммитигэр оҕолонор кыахтара суох дьахтар уонна эр киһи олус элбэх. Бу ураты болҕомтону эрэйэр, киһи сэрэнэн кэпсэтэр тиэмэтэ. Биһиэхэ сүбэ-ама ыла сүрүннээн дьахталлар бэйэлэрэ кэлэллэр. Бары дьиэ кэргэттэригэр араас кыһалҕалаахтар, араас  мэһэйдэри көрсөллөр”, — диэн Уус Алдан Оройуоннааҕы киин балыыһатын гинеколог-бырааһа Алена Добрецова кэпсиир.