Олег Иринеев: «Дьокуускайга Михаил Николаев аатынан проспега аныгы сайдыы киининэн буолуо»

Бэҕэһээ Ил Дархан Айсен Николаев Саха Өрөспүүбүлүкэтин күнүн көрсө быһа эпииргэ нэһилиэнньэттэн киирбит тыһыынчаттан тахса ыйытыкка хоруйдаата. Саха сирин олохтоохторо араас хабааннаах ыйытыылары биэрдилэр. Үгүстүк социальнай эйгэ, суол-иис, тырааныспар инфраструктурата сайдыытын туһунан ахтылынна.

Бүгүн Хаҥалас улууһун баһылыга Олег Иринеев бэҕэһээҥи быһа эпииринэн санаатын үллэһиннэ:

— Бэҕэһээ Ил Дархан Айсен Николаев дириҥ ис хоһоонноох быһа эпиирэ буолан ааста. Дьон-сэргэ ыйытыытыгар сиһилии кэпсээтэ. Бэлиэтээн эттэххэ, Ил Дархан эпииригэр 1000-тан тахса ыйытык киирдэ – бу Саха сирин олохтоохторо көхтөөхтөрүн, өрөспүүбүлүкэ инники олоҕор кыһаллалларын көрдөрөр.

Биһиги улууспут Бочуоттаах олохтооҕо, оройуон дьокутааттарын Сэбиэтин бэрэссэдээтэлин солбуйааччы Борис Протодьяконов СӨ Бастакы Бэрэсидьиэнин Михаил Ефимович Николаев аатынан проспект инфраструктуратын салгыы сайыннарыы туһунан ыйытыы биэрдэ. Кырдьык, бу бастакы Бэрэсидьиэммит, сүдү киһибит норуокка оҥорбут үтүөтүн ылан көрдөххө, дьоһуннаах ыйытык буолар. Ону Айсен Сергеевич эмиэ бэлиэтээтэ: «Михаил Ефимович мэлдьи эдэрдии өйдөөҕө-санаалааҕа сөхтөрөрө. Кини Саха сирин сайыннарарга дьулуһара, сырдык кэскилин толкуйдуура. Кини аатынан ааттаммыт проспект – Дьокуускай куорат сайдыытын саҥа киининэн буолуо», — диэтэ Айсен Сергеевич.

Ол курдук, киин куоракка Михаил Ефимович Николаев  аатынан проспегы, эпииргэ эппитин курдук, аан дойдутааҕы кампус, киинэ-павильона, ону тэҥэ Эпос уонна искусство Арктикатааҕы киинэ, саҥа олорор кыбаарталлара киэргэтиэхтэрэ. Өрөспүүбүлүкэ баһылыга эппитин курдук, муус устар 27 күнүгэр Үрдүкү муусука оскуолатын – Михаил Николаев төрүттээбит оскуолатын, бастакы сыбаайата түһэриллиэҕэ. Айсен Николаев эрэллээхтик эппитинэн, Михаил Николаев аатынан проспега чугастааҕы сылларга Дьокуускайга инновационнай, аныгы сайдыы киининэн буолуо.