Руслан Захаров: «Ытык Күөлгэ А.Е.Мординов аатынан лис­сиэй дьиэ­тэ тутуллан үлэҕэ киириэҕэ»

Таатта улууһун баһылыгын бастакы солбуйааччы Руслан Захаров улууска тутуу үлэтин туһунан санаатын үллэстэр:

– Ытык Күөлгэ 2023 сыллаахха 4 тыһ кв. м тахса иэннээх аныгылыы оҥоһуулаах поликлиника тутуллан үлэҕэ киирдэ. Бу поликлиника «Доруобуйа харыстабыла» федеральнай бырайыагынан тутуллубута. Оттон быйыл кулун тутарга Туора Күөл нэһилиэгэр 50 миэстэлээх, толору хааччыллыылаах уһуйаан аһылынна. Билигин Ытык Күөлгэ 450 оҕо үөрэнэригэр аналлаах, 100 миэстэлээх интэринээттээх, А.Е.Мординов аатынан лис­сиэй дьиэ­тэ тутуллан үлэҕэ киирэрэ хаалла. Кэлэр 2025 сылга Таатта улууһугар Манчаары оонньуулара ыытыллалларынан сибээстээн, успуорт эбийиэк­тэрэ тутулла тураллар. Национальнай бырайыактарынан уонна атын даҕаны бырагыраамаларынан тыа сиригэр элбэх тутуу баран сэргэхсийии таҕыста, сайдыы суола тэлэлиннэ.