Саха сирин сүүмэрдэммит хамаандатын дзюдоистара икки кыһыл көмүс мэтээли ыллылар

Саха сирин сүүмэрдэммит хамаандатын дзюдоистара Уһук Илин чөмпүйэнээтигэр икки кыһыл көмүс мэтээли ылары ситистилэр.

Алина Моисеева 48 кг ыйааһыҥҥа диэри Душанбеҕа дойду икки ардыларын рейтинговай турнир «Большой шлем» күрэхтэһиитигэр боруонса мэтээллээх кыайыытын кэнниттэн, Саха сирин сүүмэрдэммит хамаандатын дзюдоистара Юлия Аман уонна Собиржон Оев Уһук Илин чөмпүйэнээтин кыһыл көмүс мэтээллэрин ыллылар диэн «Триумф» успуорт уораҕайын пресс-сулууспата суруйар.

Күрэхтэһии ыам ыйын 4 күнүгэр буолан ааста. Юлия 70 кг диэри ыйааһыҥҥа кытынна, оттон Собиржон 81 киилэҕэ диэри ыйааһыҥҥа Саха сирин чиэһин көмүскээтэ. Бу ситиһии Саха сирин икки спортсменнарыгар быйыл күһүн Сочига былааннаммыт Арассыыйа чөмпүйэнээтигэр кыттарга кыах биэрдэ.