Саха Өрөспүүбүлүкэтин күнүгэр «Ытык аҕа» бэлиэни үс аҕаларга туттарыахтара

Ил Дархан Айсен Николаев үүнэр көлүөнэҕэ аҕа оруолун үрдэтиигэ, ону тэҥэ оҕону иитиигэ аҕалар ураты өҥөлөрүн күүһүрдэр сыалтан «Ытык аҕа» бэлиэни сылын ахсын алта аҕаларга аныырга Ыйаахха илии баттаабыта.

«Бу быһаарыыны чопчу дойдуга Дьиэ кэргэн сылыгар ылынан, былаас бары таһымыгар дьиэ кэргэн, ийэ, аҕа уонна оҕо аймах көмүскэлин мэктиэлэрин күүһүрдүөхпүт дии саныыбын», – диэн бэлиэтээтэ Айсен Николаев. Урут «Ытык аҕа» бэлиэни оҕолору иитиигэ ураты өҥөлөрүн иһин, Саха сирин уопсастыбаннай олоҕор улахан кылааты киллэрбит үс аҕаларга ананара. «Ытык аҕа»  үрдүк бэлиэни үс аҕаларга муус устар 27 күнүгэр – Саха Өрөспүүбүлүкэтин күнүгэр туттарыахтара. Наҕараада туппут аҕалар 100 тыһ. солк. суумалаах биир кэмнээх харчы ылыахтара. Аныгыс бэлиэни үс аҕаларга дойду үрдүнэн бэлиэтэнэр Аҕа күнүгэр туттарыахтара.

Билигин үүнэр көлүөнэҕэ аҕа оруолун үрдэтии Саха сирин судаарыстыбаннай бэлиитикэтин биир сүрүн хайысхатынан буолар. Хас биирдии киһи олоҕор аҕа суолтата улахан.

СӨ Ил Дарханын уонна Бырабыыталыстыбатын пресс-сулууспата