Саха сиригэр бастакы олимпийскай скалодрому тутуохтара

Дьокуускайга «Дохсун» успуорт уораҕайыгар 16 миэтирэ үрдүктээх скалодрому тутуохтара. Саҥа эбийиэк киин куоракка ыытыллар «Азия оҕолоро» норуоттар икки ардыларынааҕы VIII спортивнай оонньууларга анаан аһыллыаҕа. 

Тутуу Арассыыйа олимпиецтарын өйүүр пуондатын бырагырааматынан ыыттыллар. Эбийиэк 72 мөл. солк. кэриҥэ үпкэ сыаналанар. Скалодром үс сектордаах буолуоҕа — түргэнник ыттыыга, уустуктардаах ыттыыга уонна боулдериҥҥа (кылгас уустук трасса).

СӨ Успуорка уонна физкултуураҕа миниистирин бастакы солбуйааччы Александр Бугаев иһитиннэрбитинэн, билиҥҥитэ бырайыактыыр-симиэтэлиир докумуон оҥоһуллар. Скалодром 2024 сыл күһүнүгэр үлэтин саҕалыаҕа.