Саха сирин 100 бастыҥ үөрэнээччитэ кэскиллээх лидердэр пуорумнарыгар муһунна

Муус устар 27 — өрөспүүбүлүкэ күнүгэр, Наука дьоҕус акадьыамыйатын үөрэтэр-лабораторнай куорпуһугар сыл ахсын ыытыллар «Будущие интеллектуальные лидеры” диэн пуорум саҕаланна.

Бу пуорумҥа өрөспүүбүлүкэ араас муннуктарыттан эрэгийиэннээҕи, бүтүн Арассыыйатааҕы, норуоттар икки ардыларынаҕы предметнэй олимпиадалар, научнай куонкурустар, кэмпириэнсийэлэр призердара, кыайыылаахтара — 100 бастыҥ үөрэнээччи муһунна. Кинилэр истэригэр оннооҕор уратыны айан, толкуйдаан таһаарбыт, патеннаабыт оҕолор бааллар. Нэдиэлэ устата оҕолорго интэриэһинэй лиэксийэлэр, трениннэр, идэҕэ туһаайар, сэргэхситэр тэрээһиннэр, ону сэргэ былаас, биисинэс, сайдыы институтуттарын бэрэстэбииттэллэрин кытта көрсүһүүлэр буолуохтара.

Ил Дархан Айсен Николаев уонна өрөспүүбүлүкэ өйөбүлүнэн пуорум ахсыс төгүлүн ыытыллар. Пуорум бастакы күнүгэр оҕолор 2032 сылга диэри Саха сирин социальнай-экэнэмиичэскэй сайдыытын туһунан аһаҕас кэпсэтиигэ кытыннылар. Манна экэниэмикэ миниистирин солбуйааччы Александр Афанасьев, Үүнэр көлүөнэ тус сыаллаах пуондатын генеральнай дириэктэрэ Владимир Егоров, Наука дьоҕус акадьыамыйатын ректора Василий Павлов, СӨ судаарыстыбаннай сүбэһитин М.Е.Николаев референэ Николай Барамыгин кыттыыны ыллылар.

«Талааннаах оҕолорбут өрөспүүбүлүкэҕэ хаалыахтаахтар, кинилэр эрэгийиэннээҕи наука уонна Сахабыт сирин сайдыытыгар стимул биэриэхтээхтэр. Биһиэхэ олус элбэх талааннаах, инникилээх эдэр каадырдардаахпыт. Кинилэр киин куораттарга үрдүк үөрэх кыһатын бүтэрэн баран төрөөбүт дойдуларыгар эргиллэн кэлэллэр уонна талбыт идэлэринэн ситиһиилээхтик үлэлииллэр», — диэн Василий Павлов бэлиэтээтэ.

2018 сыллаахха өрөспүүбүлүкэ 2023 сылга диэри сайдыытын стратегията оҥоһуллубута. Бу стратегия 2050 сылга диэри тус көрүүлээх этэ. Стратегическай докумуон эрэгийиэн социальнай-экэнэмиичэскэй сайдыытын хайысхаларыгар билгэлиир көрдөрүүлэрдээх. Ол курдук сырьевой уонна экэниэмикэ креативнай секторыгар хайысхаланар. Билигин бу хайысхаларга үрдүк таһымнаах каадырдар наадалар. Бу туһунан СӨ экэниэмикэтин миниистирин солбуйааччы Александр Афанасьев кэпсээтэ.

«Үөрэнээччилэр өрөспүүбүлүкэбит инникитэ хайдах сайдыаҕын, хайдах үлэ кирилиэһинэн үрдүүрү , ситиһиилээх биисинэһи үлэлэтэри, технологическай бырайыактары олоххо киллэрэри ситэ билбэттэр. Үгүстэр санааларыгар ситиһии дойду улахан куораттарыгар, Москваҕа, Санк-Петербурга эрэ баарын курдук саныыллар. Ол эрээри оннук буолбатах. Бу туһунан оскуола оҕолоругар кэпсиэххэ, сырдатыахха наада», — диэн этэр Нерюнгри куоратын Е.А.Варшавскай аатынан 24 №-дээх информационнай-технологическай лиссиэй 11 кылааһын үөрэнээччитэ, СӨ Наукатын дьоҕус акадьыамыйатын чилиэнэ Вадим Быков.

Маны сэргэ оҕолор сири туһанар бөдөҥ хампаанньалары кытта ыкса үлэлэһэн, саҥа инновационнай, научнай толкуйдааһыннарын киллэрэр баҕа санаалаахтарын уонна инникитин бу хампаанньаларга үлэлии кэлиэхтэрин сөбүн туһунан иһитиннэрдилэр. Тэрээһин кыттыылаахтара социальнай-экэнэмиичэскэй сайдыыга инникилээх хайысхалары ырытыстылар. Олор истэригэр киһи олоҕун уһатартан саҕалаан, туристическай салаа сайдыытынан түмүктэннэ. Экспиэртэр уонна үөрэнээччилэр бэйэ-бэйэлэрин санааларын иһиттилэр, үүнэр талааннары өйүүр уонна сайыннарар услуобуйаны тэрийии туһунан кэпсэтистилэр.

Пуорум кыттыылаахтарыгар маастар-кылаастары, уйулҕа өттүнэн трениннэри ааһарга өссө хас да хонук баар. Маны сэргэ, пуорум чэрчитинэн, Саха сирин 100 бастыҥ үөрэнээччитигэр үөрүүлээх быһыыга-майгыга СӨ Наукатын дьоҕус акадьыамыйатын чилиэн-кэрэспэндьиэнин дастыбырыанньатын туттарыахтара.

Наука дьоҕус акадьыамыйатын тус архыыбын хаартыскалара туһанылыннылар.