Саха сирин бибилэтиэкэлэригэр «Эбээ Маайа» сахалыы тыыннаах аудио-кинигэлэр баар буолуохтара

Саха сирин үтүөлээх артыыһа, саха тылыгар остуоруйалары уонна кэпсээннэри таһаарар бастакы «Эбээ Маайа» YouTube-ханаалы төрүттээччи Майя Слепцова Тыйаатыр диэйэтэллэрин сойуустарын  куонкуруһун түмүгүнэн истипиэндьийэ ылары ситистэ.

Бу үбү-харчыны туһунан Ньурбатааҕы судаарыстыбаннай көһө сылдьар драматическай тыйаатырын артыыската саха классиктарын айымньыларын аудиоҕа уһулан кэпсээтэ уонна өрөспүүбүлүкэ бибилэтиэкэлэринэн туттарда.

«Сахалыы аудио-кинигэ ханаалын арыйаммыт төрөөбүт тылга, саха литературатыгар улахан интэриэһи үөскэтэрин көрдүбүт. Аналитика көрдөрөрүнэн, биһигини Арассыыйаҕа эрэ буолбакка, атын дойдуларынан биһиги биир дойдулаахтарбыт эмиэ истэллэр. Атын дойдуга көһөн барбыт сахалар төрөөбүт тылга тапталы сүтэрбэттэрэ сүрдээх үөрүүлээх. Биһиги ханаалбытын оскуола оҕолоро да, улахан көлүөнэ дьон да интэриэһиргииллэр, истэллэр. Доруобуйаларынан хааччахтаах дьон махталлара олус элбэх. Аныгы үйэҕэ  төрөөбүт тылы тарҕатарга, харыстыырга ханнык баҕарар ньымалары туһанан тэҥҥэ хардыылыахха наада», — диир Майя Слепцова. Судаарыстыбаннай истипиэндьийэ саха классиктарын айымньыларын киэҥ эйгэҕэ тарҕатарга кыах биэрдэ уонна сотору кэминэн бибилэтиэкэлэринэн баар буолуоҕа.

«Билигин үгүс дьон аудио-кинигэни ТГ- ханаалларынан тарҕатарга көрдөһөллөр. Маннык ньыма интэриниэт суох сиригэр холбоммокко эрэ истэргэ кыах биэрэр. Холобур, ыраах айаҥҥа, от үлэтигэр. Ол курдук, салгыы Саха сиригэр мунньуллубут матырыйааллары флешкаҕа уган тарҕатыахха наада дии саныыбыт. Итиэннэ ханнык баҕарар киһи  босхо оройуон бибилэтиэкэлэриттэн хачайдыахтарын сөп», — диэн Майя Слепцова бэлиэтээтэ.