Саха сирин быраастара Кировскайга үлэлииллэр

Саха сирин быраастара ДНӨ Кировскай куоратын олохтоохторун доруобуйаларын туругун көрөллөр-истэллэр. Кировскайга кардиолог быраас Филипп Харлампьев уонна УЗИ бырааһа Николай Стручков бааллар.

Өрөспүүбүлүкэтээҕи 2-с №-дээх балыыһа быраастара Донецкай Норуодунай Өрөспүүбүлүкэ олохтоохторун доруобуйаларын көрө-истэ барбыттара диэн тэрилтэ пресс-сулууспата иһитиннэрэр. Билигин онно кардиолог быраас Филипп Харлампьев уонна УЗИ бырааһа Николай Стручков бааллар.

«Нэһилиэнньэни сарсыарда аҕыстан киэһэ алтаҕа диэри көрөбүт. Итиэннэ байыаннай сулууспалаахтары, эчэйбиттэри, байыаннай дьайыы кыттыылаахтарын эмиэ эмтиибит. Олохтоохтор олус истиҥнэр, онон үлэлииргэ судургу», — диир Филипп Андреевич.

Саха сирин исписэлиистэрэ Кировскайдааҕы балыыһа кардиологтарыгар маастар-кылаастары ыыттылар, сүбэ-ама биэрдилэр.

Өрөспүүбүлүкэтээҕи харах балыыһатын сүрүн бырааһа Иван Луцкан салалталаах Саха сирин быраастарын дэлэгээссийэтэ Донецкайга ааспыт нэдиэлэттэн үлэлиир.