Саха сирин олохтооҕо Египетка Нил өрүскэ ууга түспүт оҕону быыһаабыт

Египетка Саха сирин олохтооҕо, урбаанньыт Евгений Кривошапкин наадалаах кэмҥэ, наадалаах сиргэ тиийэн, хорсун быһыыны оҥорон, оҕону быыһаабыт.

Быһылаан оптуобуһунан экскурсия кэмигэр буолбут. Бастаан Евгений кыра уол оҕо Нил өрүскэ түспүтүн бэлиэтии көрбүт. Уол оҕо күүстээх өрүс сүүрүгэр охсуллан, хараабыллар турбут понтоннар анныларыгар бара сыыспыт. Олохтоохтор көмөлөһө сатаабыттар. Ол эрээри, уолу биэрэккэ соһон таһааралларыгар тыыммат буолбут. Бастаан утаа Евгений оҕо өлбүт диэн санаабыт. Ол да буоллар, быыһааччылар куурустарыгар сылдьыбыт буолан, оҕону быыһыырга быһаарыммыт. Оҕону атаҕыттан өрө таҥнары тутан, тыҥатыттан уу тахсарыгар көмөлөспүт. Түмүгэр оҕо тыынын ылан, өйүгэр кэлбит.

«Туох буолбутун өйдөөбөккө да хаалбытым», — диэн Евгений санаатын үллэһиннэ. Ол түбэлтэ туһунан билэн, оҕо ийэтэ тута быһылаан тахсыбыт миэстэтигэр сүүрэн кэлбит. Быһылаан кыттыылаахтара Евгенийга хорсун быһыытын уонна суһаллык быһаарыы ылыммытын иһин махталларын биллэрдилэр.

«Быһылаан кэнниттэн оҕо хайдаҕа буоллар диэн өрүү саныыбын», — диэн Евгений СИА-ҕа кэпсээтэ. Бу холобур соһуччу түгэҥҥэ дьону быыһыыр үөрүйэхтээҕин туһалааҕын көрдөрөр.