Саха тыйаатырыгар — күүтүүлээх испэктээк

Былатыан Ойуунускай аатынан Саха тыйаатыра күндү көрөөччүлэрин муус устар 27, 28, 29, 30 күннэригэр Василий Яковлев-Далан арамаанынан туруорбут «Тулаайах оҕо»  диэн саҥа испэктээгэр ыҥырар. 

Тыйаатыр режиссера Руслан Тараховскай былыргы былдьаһыктаах дьылларга Саха сиригэр олорон ааспыт, хааннаах кыргыһыыларга сиик буолан симэлийбит, тыал буолан көппүт тумат омук, тоҥ биистэр олохторун икки тулаайах оҕо дьылҕатынан көрдөрөр.

«Тулаайах хаалбыт тумат хоһууна Даҕанча өс-саас бэлиэтин хааннаах илкээнини батыһан, аҕатын иһин Үрэн Хоһуун иһин иэстэһэ, тоҥ биис хоһуунун Маҥан Мэкчэ ир суолун ирдээн, тоҥ суолун тордоон барар айанын аартыга хаан-уруу дьонугар аҕалыыта, кини дьылҕатын эрэ буолбакка, бүтүн тумат омугун инники дьылҕатын тосту уларытар.

Кыргыһыы хонуутугар тулаайах хаалбыт хорсун сүрэхтээх тоҥ биис кыысчаана Ньырбачаан, Бүлүү бөлөх сахаларын төрүттүүр дьылҕатын быатыгар, өстөөхтөртөн быыһанан тыыннаах хаалар айанын эриирдээх ыллыга улуу Туймаада туһаайыытынан аартыгы арыйар.

Үгүс көрөөччү долгуйа күүтэр «Тулаайах оҕо»  арамааны инсценировкалааһыҥа Майя Власьева, Дьулустан Семенов, онтон сценографиятыгар Михаил Егоров үлэлээтилэр, көстүүмнэр Сардана Федотова, Дария Дмитриева толкуйдарынан оҥоһулуннулар.