Байыаннай дьайыы кыттыылаахтарын уонна кинилэр дьиэ кэргэттэрин кэлимсэ чөлүгэр түһэриини сайыннарар үлэ салҕанар

Саха сирин баһылыгын Айсен Николаев сорудаҕынан Саха сиригэр байыаннай дьайыы кыттыылаахтарын уонна кинилэр дьиэ кэргэттэрин  кэлимсэ чөлүгэр түһэриини сайыннарар үлэ Дьокуускай, Нерюнгри, ону тэҥэ Өлүөхүмэ, Амма уонна Ньурба оройуоннарыгар баар өрөспүүбүлүкэтээҕи чөлүгэр түһэрэр кииннэргэ салҕанар. Үлэ уонна социальнай сайдыы министиэристибэтин бас билэр тэрилтэлэригэр 82 кыттааччы уонна кинилэр дьиэ кэргэттэрин 121 чилиэнэ доруобуйаларын чэбдигиртилэр. Бу туһунан бүгүн Саха сирин үлэҕэ уонна социальнай сайдыыга миниистирин бастакы солбуйааччы Альбина Трубина брифиҥҥэ иһитиннэрдэ.

Альбина Трубина бастаан кэлимсэ диагностика ыытыллан, итиннэ олоҕуран байыаннай эпэрээссийэ кыттыылааҕын, биитэр дьиэ кэргэнин чөлүгэр түһэрэр чопчу бырагыраама оҥоһулларын санатта. Психологы уонна социальнай үлэҕэ исписэлииһи кытта үлэ ыытыллар.

“Өрөспүүбүлүкэтээҕи инбэлииттэри социальнай-чэбдигирдэр кэлимсэ кииҥҥэ Дьокуускайга байыаннай эпэрээссийэ кыттыылаахтарыгар чөлүгэр түһэрии анал бырагыраамалара оҥоһулуннулар. Итиннэ гидрокинезотерапия уонна иппотерапия эмиэ киирэллэр, култуура уонна успуорт тэрилтэлэригэр сылдьыы тэриллэр”, — диэтэ миниистири бастакы солбуйааччы.

Альбина Трубина этэринэн, байыастарга уонна кинилэр дьиэ кэргэттэригэр социальнай хантараакка олоҕуран судаарыстыбаттан социальнай көмө оҥоһуллар. Манан 15 ыал чилиэнэ туһаммыт, ол иһигэр олоххо ыарахан балаһыаннаьаны этэҥҥэ аһарыныыга.

Ону тэҥэ идэҕэ бэлэмнииллэр уонна салгыы үлэҕэ ылыыга үлэ барар.

“Дьокуускайга Идэҕэ уонна медико-социальнай чөлүгэр түһэриигэ өрөспүүбүлүкэтээҕи интэринээт-техникумугар идэҕэ туһаайар үлэ уонна эбии үөрэтии ыытыллар. “Асчыт”, “Иистэнньэҥ”, “Веб-дизайн” уонна сайты оҥоруу” хайысхаларга олус наадыйаллар”, — диэтэ Альбина Трубина.

Маны сэргэ кииннэр исписэлиистэрэ социальнай өйөбүлгэ сүбэ-ама биэрэллэр, босхо юридическай көмөнү оҥорууга көмөлөһөллөр.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.