Сангаар үбүлүөйүн көрсө — саҥа тутуулар

Кэбээйи улууһугар Сангаар 2028 сылга 100 сылын туолуо.

Бу бэлиэ даатаны көрсө, өрөспүүбүлүкэ сайдыытыгар бөһүөлэк устуоруйаҕа киирэр ураты оруолун бэлиэтээн туран, Ил Дархан үбүлүөйдээх тэрээһиннэри ыытар туһунан дьаһалга илии баттаабыта уонна тэрийэр кэмитиэт састааба бигэргэтиллибитэ. Итинэн сибээстээн СӨ Бырабыыталыстыбатын Бэрэссэдээтэлин солбуйааччы Георгий Степанов салайааччылаах оробуочай бөлөх Сангаарга тиийэн үлэлээтэ. Оробуочай сырыы сүрүн сыала-соруга 100  сыллаах үбүлүөйдээх тэрээһиннэри ыытыыга бэлэмнэниини билии-көрүү буолла. Вице-премьер тэрээһин кэлим былаанын бырайыагар киллэриллибит бөһүөлэк социальнай эбийиэктэрин тутууну билистэ.

Георгий Степанов Саха сиригэр чох бырамыысыланнаһын сайдыытыгар Сангаар сүдү оруолун ыйан туран, бу хайысхаҕа сайдыы саҥа сүүрэннэрин бэлиэтээтэ.

Сүбэ муньахха СӨ Бырабыыталыстыбатын Бэрэссэдээтэлин солбуйааччы Георгий Степанов 2023 сыллаахха Кэбээйигэ оробуочай сырыы түмүгүнэн бэриллибит СӨ Ил Дарханын сорудаҕа толоруллуутун көрдө. Бэриллибит ыйытыыларга улуус куратора, СӨ юстицияҕа судаарыстыбаннай кэмитиэтин бэрэссэдээтэлэ Павел Иванов иһитиннэриини оҥордо.

СӨ Ил Дарханын уонна Бырабыыталыстыбатын пресс-сулууспата