Сардаана Сивцева: «Арктикаҕа ыытыллар үлэ салҕанарын биһирээтим»

Бу күннэргэ Саха сирин уопсастыбаннаһа Владимир Путин дойду баһылыгын быыбарыгар туруммутун өйүүрүн туһунан  санаатын этэр, үллэстэр.

Сардаана СИВЦЕВА, «АРКТИК КАПИТАЛ» сир баайын хостуур холдинг пресс-сулууспатын салайааччы,  СӨ Арктика сайдыытыгар уонна хотугу норуоттар дьыалаларыгар министиэристибэтин иһинэн Уопсастыбаннай сэбиэт эппиэттээх сэкирэтээрэ:

— Биһиги Арктикабыт геополитикаҕа, муора суолун логистикатыгар, сир баайын хостооһуҥҥа уонна да атын өрүттэргэ суолтата үрдээн турар. Мин төрөөбүт дойдум Арктика улуустарыгар киирсэр буолан уонна үлэм чэрчитинэн, онно дьон хайдах-туох олорорун билэрбинэн сиэттэрэн, дойдубут бэрэсидьиэнэ Владимир Путин сыл аайы буолар кэмпириэнсийэтигэр Арктика сайдыытыгар туох көрүүлээҕин, санаалааҕын, дьон ханнык ыйытыктары киниэхэ туруоралларын болҕомтобор уурбутум.

Кэнники сылларга Арктика сиригэр-уотугар элбэх, араас хабааннаах үлэ бара турар, ол иһигэр олохтоохтор сүрүн кыһалҕаларын быһаарар боппуруостарга: суолу-ииһи тупсарыыга, авиапортары саҥардыыга, аныгылыы сибээс ситимин тардыыга, аһынан-таҥаһынан хааччыйыыга, олох-дьаһах да өттүттэн. Онон дуоһуйа иһиттим, Владимир Владимирович бу үлэ барыта салҕаныа диэбитин. Ол аата биһиги сайдыы суолунан дьаныардаахтык инникибит диэки дьулуруйан иһиэхпит.

Иккиһинэн, үрдүкү былааска биир тыллаах, күүстээх санаалаах, туох да улуу мэһэйдэртэн толлубат салайааччы үлэлиэхтээх диэн мин тус бэйэм бигэ эрэллээхпин. Бу ыарахан кэм көрдөрөрүнэн, маннык киһинэн Владимир Владимирович Путин буолар. Элбэх дьон ону өйдөөн эрэллэрэ көстөр.

Кини норуокка тириэрдэ сатыыр сүрүн өйдөбүлэ — патриот буолуохтаахпыт диэн, тылынан буолбакка, дьыаланан. Бары биир кэлим буолан, дойдубут, дьоммут туһугар үлэлээтэхпитинэ, Арассыыйа бүттүүнэ туспа, ураты суоллаах-иистээх дойду буола сайдан иһиэҕэ. Бу барыта биир күнүнэн, биир сылынан ситиһиллибэт, ол эрээри сөптөөх суол-иис тобуллан, Владимир Владимирович Путин салалтатынан үлэ бара турар.