Сардаана Трофимова Олимпийскай оонньууларга путевка иһин марафоҥҥа кыттыаҕа

Сарсын, муус устар 14 күнүгэр, спортсменка Сардаана Трофимова Ганновер куоракка ADAC марафоҥҥа кыттыаҕа.

Спортсменка бэйэтэ эрдэ эппитинэн, бу Парижка ыытыллар сайыҥҥы олимпийскай оонньууларга кыттарга холонуутунан буолар. Азия оонньууларын боруонса призердара, Кыргызстан сүүмэрдэммит хамаандатын чилиэнэ Сардаана Трофимова Олимпийскай нуорманы толорорго,  марафоҥҥа 2:26:50 түмүгү көрдөрүөхтээх.  Спортсменка тус рекорда бүгүҥҥү күҥҥэ — 2:24:38. Кини ити көрдөрүүнү 2015 сыллаахха Франкфуртка олохтоон  турар.

Марафоҥҥа Сардаана Трофимова 1600 м. үрдүктээх Бостери сэлиэнньэҕэ уонна 960 м. үрдүктээх Ош куоракка бэлэмнэммит.

Ганновердааҕы марафон муус устар 14 күнүгэр олохтоох бириэмэнэн сарсыарда 09:00 ч. саҕаланар.

Бэлиэтиир буоллахха, Парижка Олимпийскай оонньууларга путевканы тустуук Георгий Окороков туппута. Кини Египеккэ Африка уонна Океания турнирыгар Австралияттан киирсибитэ. Маны сэргэ, Олимпийскайга оонньууларга Арыйан Тютрин кыттар. Кини аан дойдутааҕы аренаҕа Беларусь хамаандатыттан киирсэр.