“Тымныы оройо – Өймөкөөн” марафоҥҥа Иннокентий Федоров кыайда

“СПИД-киин” исписэлииһэ Иннокентий Федоров “Тымныы оройо – Өймөкөөн”  V экстремальнай марафоҥҥа 1 миэстэни ылла.

«Наһаа тымныы этэ, ол да буоллар, мин кыайыылаах таҕыстым”, — диэн Иннокентий Иннокентьевич бэйэтин ситиһиитин туһунан сэмэйдик кэпсиир.

Кини тыйыс тымныыга 21,1 килэмиэтири сүүрэн (сүүрэр кэмнэригэр  55°С этэ),  50-59 саастаахтарга 1 миэстэни ылбытын туһунан биир идэлээхтэрэ кэпсээтилэр.

Манна даҕатан эттэххэ, Иннокентий Федоров  былырыын эмиэ 10 килэмиэтиргэ кыайыылаах тахсыбыта. Экстремальнай сүүрүүнэн иккис сылын дьарыктанар.

«Күрэхтэһии кэмигэр араас буолааччы: ким эрэ тарбахтарын үлүтэр, ким эрэ тыынара ыарыыр, ким эрэ сүүрүүттэн туоруур… Мин күн аайы уулуссаҕа эрчиллэрим олус көмөлөстө.   “СПИД-Киин” кэлэктиибигэр уонна салалтатыгар өйөбүллэрин иһин улахан махтал”, — диэн марафон кыайыылааҕа Иннокентий Федоров махталын биллэрдэ.