Семен Никитин: «Андаҕар биэрдиҥ – Ийэ дойдуну көмүскүүргэ бэлэм буолуохтааххын!»

«Бу буола турар анал байыаннай эпэрээссийэҕэ сиэммин уонна икки сиэн бырааттарбын алҕаан атаардым. Кинилэр Аҕа дойдуларын көмүскүүргэ бирисээгэ биэрбиттэрэ. Андаҕар биэрдиҥ – Ийэ дойдуну көмүскүүргэ бэлэм буолуохтааххын. Онтон атын буолар туһа суох!”, — диир оставкаҕа олорор майор, Алжирга ыытыллыбыт “кистэлэҥ” анал эпэрээссийэ кыттыылааҕа, Ил Түмэн дьокутаата Семен Никитин.

— Аҕа дойду Улуу сэриитигэр биһиги аармыйабыт бигэ тыыллаах буолан, ити үлүгэрдээх уоттаах сэриигэ тулуһан, кыайан турар. Биһиги билиҥҥи сыалбыт-сорукпут – аармыйабытыгар итинник бигэ уонна күүстээх тыыл буолуохтаахпыт. Хас биирдиибит миэстэтигэр бэйэтин эбээһинэстэрин үтүө суобастаахтык толоруох тустаах. Итинэн биһиги Кыайыыны чугаһатабыт. Уонна биири өйдүүр, учуоттуур наада – аармыйаҕа ыҥырыллан барбыт эр дьоммут бойобуой туруктара кинилэр дьиэлэригэр барыта этэҥҥэ уонна нус-хас быһыы-майгы баарыттан улахан тутулуктааҕын. Буойуттарбытыгар биһиги итинник эрэл санааны хайаан да биэриэхтээхпит, — диэн санаатын үллэһиннэ.