Суруйааччылар айар ааттара туох суолталааҕый?

Саха суруйааччылара бары кэриэтэ айар ааттаахтар. Ол айар ааттара бэйэлэрин ааттарынааҕар ордук биллэр буолар. Дьэ, туох суолталаах ааттары ылыммыт эбиттэрий?

Н.Е. Мординов-Амма Аччыгыйа уутун иһэн улааппыт эбэтин — Амма өрүс кырата-харата диэн өйдөбүлтэн таһаарбыт.

Н.Г. Золотарев-Якутскай — Саха сирин тас өттүгэр олорор суруйааччы төрөөбүт дойдутун аатынан ааттаммыт.

А.А. Бэрияк дьиҥнээх араспаанньата Васильев диэн. Кэлин төрөөбүт нэһилиэгин Бээрийэ аатын ылынан псевдоним, онтон араспаанньа оҥостубут.

А.А. Иванов-Күндэ, Ф.Г. Винокуров-Даадар төрөөбүт дойдуларыгар — Сунтаар Кутанатыгар баар Дириҥ Күндэ күөл, Томпо Кириэс Халдьаайытыгар баар төрөөбүт үрэҕин, А.С. Егоров-Альберт Бүлүүйүскэй, С.П. Онуфриева-Сардаана Амгинская төрөөбүт өрүстэрин аатынан ааттаммыттар.

С.С. Васильөв-Борогонскай, Н.В. Слепцов-Абыйчанин, И.Н. Егоров-Иван Горнай, Г.Е. Старостин-Байаҕантай төрөөбүт улуустарын, А.Г. Кудрин-Абаҕыыныскай, П.Я. Прокопьев-Чуукаар, В.Ф. Гольдеров-Ороһу Уола, Х.П. Горохов-Элгэстэй, М.Е. Иванов-Чуона Мэхээлэ, И.Е. Иванов-Ороһуунускай, С.А. Попов-Тумат, Е.П. Пестряков-Дьөгүөр Түбэ, С.Н. Сивцев-Доллу төрөөбүт, А.Д.Сивцев-Айсен Дойду, И.Н. Корякин-Уйбаан Бөтүүнүскэй олорбут, үлэлээбит нэһилиэктэрин аатын ылыммыттар.

Оттон С.Р. Кулачиков-Эллэй аата норуот сэһэнигэр киирбит өбүгэбит, саха маҥнайгы култуурунай дьоруойун аатын кытта ситимнээх.

Г.В. Баишев-Алтан Сарын диэн аал уот иччитин биир аата, эпитета буолар.

С.А. Саввин-Күн Дьирибинэ «Дьулуруйар Ньургун Боотур» олоҥхоҕо баар орто дойду дьонун көмүскээччи айыы бухатыыра Күн Дьирибинэ аатын ылыммыт.

Е.П. Шестаков-Эрчимэн «Эрчимэн Бэргэн» олоҥхо дьоруойун аатын ылыммыт буолуон сөп.

О.Н. Корякина-Умсуура — «Дьулуруйар Ньургун Боотур» олоҥхоҕо баар Айыы Умсуур удаҕан аатын «а» буукубаны эбэн, ылыммыта.

Ю.И. Васильев-Дьаргыстай «Хаан Дьаргыстай» олоҥхо сүрүн дьоруойун аатын ылыммыт.

«Саха уран суругун эйгэтигэр умсулҕаннаах айан» кинигэттэн.