Төһө байыаһы үлэнэн хааччыйдылар?

СӨ нэһилиэнньэ дьарыктаах буолуутун сулууспата байыаннай дьайыы кыттыылаахтарыттан уонна байыаннай сулууспалаахтар дьиэ кэргэннэритэн 150 киһини үлэҕэ киллэрдэ.

“Биһиги хас биирдии киһиэхэ болҕомтолоохтук сыһыаннаһабыт. Кинилэргэ биһиги быһаарыыбытыгар киирэр судаарыстыба бары өҥөлөрүн оҥоробут, уйулҕа өттүнэн өйөбүлтэн саҕалаан уонна идэҕэ тиийэ. Уопсайа биһиэхэ байыаннай дьайыы 90 кыттыылааҕа кэлэ сырытта. Кинилэртэн 38 киһини үлэҕэ киллэрдибит. Байыаннай сулууспалаахтар дьиэ кэргэннэрин чилиэннэриттэн Дьарыктаах буолуу сулууспатыгар кэлбит 177 киһиттэн 112-тин үлэнэн хааччыйдыбыт”, — диэн кэпсээтэ олунньу 20 күнүгэр ыытыллыбыт брифиҥҥэ Саха сирин дьарыктаах буолууга киинин салайааччытын бастакы солбуйааччы Игорь Соловьев.

Байыаннай дьайыы кыттылаахтара уонна кинилэр дьиэ кэргэттэрин чилиэннэрэ идэҕэ уонна эбии идэни баһылыырга  үөрэнэллэр. Бойобуой дьайыылар үгүс бэтэрээннэрэ баахтанан бырамыысыланнас тэрилтэтигэр үлэлиэхтэрин баҕараллар. Бу хайысханан тустаах сулууспа үлэни тэрийэр, оттон бырамыысыланнас хампаанньалара көмөлөһөргө бэлэмнэр.

Былырыын бу сулууспа нөҥүө байыаннай дьайыы 39 кыттыылааҕа уонна дьиэ кэргэттэрин 45 чилиэнэ үөрэммитэ. Кинилэр “хайа оробуочайа, “компрессорнай установка машиниһа”, “харабыл”, “докумуону оҥорооччу”, “кэмиэрчэскэй агент”, “буҕаалтыр”, “иитээччи” идэлэрин ылбыттара.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата