Төрөөбүт тылы харыстааһыҥҥа — Оҥоһуу өй: Айсен Николаев саҥа бырайыактары өйөөтө

Саха сирин Ил Дархана Айсен Николаев Наука академиятын Төрөөбүт тылы үөрэтэр, харыстыыр уонна сайыннарар киинин салайааччыта Феодосия Габышеваны кытта көрүстэ. Сүрүн кэпсэтии Аан дойдутааҕы төрүт олохтоох норуоттар тылларын уон сылын (2022–2032) чэрчитинэн саҥа ньымалары уонна оҥоһуу өйү үөрэххэ киллэриигэ ананна.

Феодосия Габышева бэлиэтииринэн, билигин төрөөбүт тылы үөрэтии наука саҥа таһымыгар таҕыста. Психолингвистика, нейролингвистика уонна оҥоһуу өй көмөтүнэн оҕолору үөрэтэр саҥа ньымалар оҥоһуллаллар. Бу хайысхаҕа Арассыыйа үрдүкү научнай тэрилтэлэрин кытта бииргэ үлэлээһин барар.

«Төрөөбүт тыллары сайыннарар көҕүлээһиннэри биһиги мэлдьи өйүөхпүт. Наука ситиһиилэрэ уонна саҥа технологиялар оҕолорбут тылларын, норуоттарын үгэстэрин билэллэригэр туһалыахтаахтар. Манна учуонайдар, педагогтар, уопсастыбаннай тэрилтэлэр уонна былаас бииргэ үлэлэһиилэрэ наада», — диэн Айсен Николаев эттэ.

Мунньахха үөрэҕириигэ улуустар ардыларынааҕы ситим сайдан иһэрэ бэлиэтэннэ. Холобур:

• Бүлүүтээҕи үөрэх пуорума — 5 улууһу түмэр.
• Арктикатааҕы үөрэх пуорума — 13 хотугу оройуону хабар.
• Эмиэ маннык бииргэ үлэлэһии бырайыага ааспыт сылтан уҥуоргу улуустарга саҕаланна. Маннык түһүлгэлэр учууталларга уопут атастаһалларыгар улахан көмөнөн буолаллар.

Көрсүһүү түмүгүнэн биир улахан быһаарыы ылылынна — 2027 сылга Дьокуускайга норуоттар икки ардыларынааҕы эспиэрдэр кыттыылаах Бүтүн Арассыыйатааҕы кэмпириэнсийэ ыытыллыаҕа. Манна сүрүн болҕомто төрөөбүт тылы үөрэтиигэ уонна ааҕыыга оҥоһуу өйү туһаныыга ууруллуоҕа.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.

Сиһилии: https://www.sakha.gov.ru/news/68199